Ավելի ճիշտ կլինի, եթե վարչապետ դառնա Սերժ Սարգսյանը, որպեսզի վերջապես լիակատար պատասխանատվություն ստանձնի: Այս մասին հուլիսի 10-ին` ԱԺ-ում լրագրողների հետ զրույցում ասաց «Ելք» դաշինքի պատգամավոր Սասուն Միքայելյանը:
Նրա խոսքով` դրանով վերջ կտրվի նաեւ երկրում վարչապետների պարբերական փոփոխությանը: «Մի քանի տարում մենք այնքան վարչապետ ենք փոխել: Եթե շարունակենք 1-2 տարին մեկ վարչապետ փոխել, եւ նրանցից ոչ մեկը ժողովրդի, պետության առջեւ պատասխանատվություն չի կրելու, ապա ճիշտ կլինի, որ վարչապետ դառնա Սերժ Սարգսյանը` այս ամենին վերջ տալով»,- նշեց Միքայելյանը: Նա շեշտեց, որ սա իր անձնական կարծիքն է, այլ ոչ Ելք» դաշինքի, այնուհետեւ շարունակեց, որ այս բոլոր տարիների ընթացքում երկրում իրավիճակ է ստեղծվել, երբ փոփոխությունների համար վարչապետին էին փոխում: «Իսկ այս դեպքում Սերժ Սարգսյանի չի կարողանա ինքն իրեն փոխել»,- ասաց Սասուն Միքայելյանը:
Հիշեցնենք, որ ավելի վաղ ԱԺ նախկին խոսնակ Գալուստ Սահակյանը հայտարարել էր. «Մեկ մարդ կա, որը քաղաքական մեծ թիմ ունի եւ նոր անկախ Հայաստանի պատմության մասնակիցն է: Ժողովուրդը պետք է հասկանա, որ առաջիկա տարիներին երկիրը պետք է կառավարի Սերժ Սարգսյանը»: