Հանրապետական կուսակցությունը հանցավոր խումբ է, որի ղեկավարը Սերժ Սարգսյանն է: Այս մասին այսօր՝ հուլիսի 10-ին, խորհրդարանում ասաց Ազգային ժողովի «Ելք» խմբակցության ղեկավար Նիկոլ Փաշինյանը:
«Հանրապետականները շատ են ասում, որ իրենք ստացել են ժողովրդի վստահության քվեն: Շատ կարեւոր է հասկանալ, թե ինչպես են ստացել դա: Երեւանի ավագանու ընտրությունների նախընտրական քարոզարշավի վերջին օրը ահազանգեր ստացվեցին, որ ՀՀԿ շտաբներում բաժանվում են ընտրակաշառքներ: Մենք կարողացանք ապացույցներ ձեռք բերել շտաբներից մեկի մոտ գտնվող աղբարկղից: Առաջինն այնտեղ կար ընտրակաշառք բաժանելու ուղեցույց, թե ինչ պիտի անի իրեն հարգող ընտրակաշառք բաժանողը: Առաջինը՝ պիտի ասի «բարեւ ձեզ», սա երեւի կոդ է, մի ժամանակ Շարմազանովն էլ անընդհատ ասում էր՝ բարեւ ձեզ: Հետո «տան ակտիվիստի հետ առանձնանալ ննջասենյակ կամ բաղնիքներ՝ զապիսից խուսափելու համար»: Հանրապետականի նախընտրական ամենաւոժեղ հարթակներն են՝ ննջասենյակն ու բաղնիքները»,- ասաց Նիկոլ Փաշինյանը:
Ընդդիմադիր խմբակցության ղեկավարը հարց հնչեցրեց՝ հնարավոր է այս ցուցակը վերաբերում է, օրինակ, «Ելք» դաշինքին, ապա ինքն էլ պատասխանեց՝ կա երկու փաստաթուղթ, որտեղ գրված է՝ «ՀՀԿ ձայն» եւ բաց է թողնված, իսկ երրորդ տողում՝ «700 ձայնից պակասի դեպքում գումարը վերադարձնում եմ՝ Ա. Ազոյան»:
«Պարզվում է, որ Ա. Ազոյանը ՀՀԿ-ի շտաբի պատասխանատուն է տեղամասերից մեկում: Ի՞նչ պիտի անի քաղաքացին. պիտի դիմի իրավապահ մարմիններին՝ ոստիկանություն, բայց այստեղ էլ է խնդիր ծագում, որովհետեւ նույն շտաբը ֆաքս է ստացել ոստիկանությունից, որտեղ գրած է, թե ՊՊԾ գնդի որ ծառայողը քանի ձայն է ապահովելու ՀՀԿ-ի համար: Ցուցակն էլ ուղարկել էին «Սաս» սուպերմարկետի թիկնապահների պետին, իսկ ի՞նչ է ասել ԿԸՀ-ն սրա մասին: Ասել է՝ էս մասը, որ գրված է OK, օրենքի տառին չի համապատասխանում, պիտի գրված լիներ Օկայ: Այս ամբողջն ընտրության մասին չէ, սա հանցավոր խմբի գործունեության մասին է, որի անունը ՀՀԿ-ն է, եւ սա կապացուցեմ ցանկացած ատյանի առաջ, այս հանցավոր խմբի ղեկավարն էլ Սերժ Սարգսյանն է»,- նշեց Փաշինյանը: