Նոր մանրամասներ են հայտնի նախօրեին Արցախում հակառակորդի արձակած կրակոցից ժամկետային զինծառայող Վազգեն Պողոսյանի զոհվելու մասին: Քննչական կոմիտեի տեղեկացմամբ՝ զինծառայողը հրազենային վիրավորում է ստացել գլխի շրջանում: Նա մահացել է հոսպիտալ տեղափոխվելու ճանապարհին:
Վազգենը 1.5 տարվա զինծառայող էր, հուլիսի 12-ին կդառնար 20 տարեկան: Նա հետմահու պարգեւատրվել է «Մարտական ծառայություն» մեդալով: Ժամկետային զինծառայողը Վայոց ձորի Հորբատեղ գյուղից էր: Շուրջ 300 բնակիչ ունեցող Հորբատեղը 2017 թվականի սկզբից երկրորդ զինծառայողին է կորցնում:
Աբովյանում ողբերգական պատահար է տեղի ունեցել: Շենքերից մեկի 5-րդ հարկի բնակարանի պատուհանից 3 տարեկան երեխա է ընկել ու մահացել: Մեր տեղեկություններով՝ տղան ընտանիքի միակ զավակն էր: Նա տանը մոր հետ մենակ է եղել:
Ավագանու ընտրությունների ընթացքում Տարոն Մարգարյանի նախընտրական արշավին Գոռ Վարդանյանի ակտիվ մասնակցությունը, կարելի է ասել, պարգեւատրվեց: Մարզիկ-դերասան-կինոռեժիսոր Վարդանյանը նշանակվել է Տարոն Մարգայանի խորհրդական. նա կհամակարգի քաղաքապետարանի աշխատակազմի սպորտի բաժնի աշխատանքները: Երեկվանից սոցիալական ցանցերում ակտիվորեն քննարկվում է Մարգարյանի այս նշանակումը: Օգտատերերը տարակուսում են. քաղաքապետին ի՞նչ խորհուրդ կարող է տալ կարատեիստ-դերասանը, որի գրագիտության աստիճանն օգտատերերի մոտ կասկածի տեղիք է տալիս: Հիշեցնենք, որ քարոզարշավի մեկնարկին լրագրողները փորձել էին ճշտել Վարդանյանի կարծիքը, թե ինչո՞ւ այսքան տարի քաղաքապետի պաշտոնը զբաղեցրած Տարոն Մարգարյանը չի լուծել քաղաքի անհետաձգելի խնդիրները: Վարդանյանը պատասխանել էր՝ «Ամեն ինչի վատ ձեւի եք նայում», եւ հորդորել «բարի աչքով նայել Երեւանի խնդիրներին»:
«Ոսկե Ծիրան 2017» կինոփառատոնի «Հայեր. հայացք ներսից եւ դրսից» արտամրցութային ծրագրի չեղարկումը մեծ արձագանք է ստացել: Ատոմ էգոյանն ու Արսինե Խանջյանը սա գրաքննություն են որակել եւ խորը մտահոգություն հայտնել մի ամբողջ ծրագիր չեղարկելու որոշման կապակցությամբ: «Ոսկե Ծիրան 2017»-ի ծրագրերի համակարգող Րաֆֆի Մովսիսյանն ասում է՝ արտամրցութային ծրագրի չեղարկման պատճառը դրանում ընդգրկված՝ ԼԳԲՏ հանրության մասին պատմող երկու ֆիլմերն են:
Կինեմատոգրաֆիստների միությունը պահանջել է դրանք հանել ծրագրից՝ հրաժարվելով ցուցադրությունների համար տարածք տրամադրել: Խտրականությունից խուսափելու համար «Ոսկե Ծիրանի» տնօրինությունը որոշել է փառատոնից ընդհանրապես հանել «Հայեր. հայացք ներսից եւ դրսից» ծրագիրը: Կինեմատոգրաֆիստների միությունում պատճառաբանել են, որ ֆիլմերի ցուցադրությունից հրաժարվելը կապված է միության նախագահ Ռուբեն Գեւորգյանցի մահվան հետ. միությունը սուգ է պահում:
Ռուսաստանում հայկական հերթական տրանսպորտային միջոցն է վթարվել: 3 անձ, բոլորը՝ Հայաստանի քաղաքացիներ, տարբեր մարմնական վնասվածքներով հիվանդանոց են տեղափոխվել: Երեւան-Անապա երթուղու Mercedes Vito միկրոավտոբուսը Ստավրոպոլի երկրամասում կողաշրջվել է: Տուժել են վարորդը՝ 1961 թվականին ծնված Սեյրան Շահվերդյանը, ինչպես նաեւ ուղեւորներ Արսեն Ազիզյանը եւ Սոֆիկ Ալոյանը: Տուժածների վիճակը միջին ծանրության է: Միկրոավտոբուսում Հայաստանի 7 քաղաքացի է եղել:
Դոլարի փոխարժեքը նվազել է, իսկ եվրոն երեկվա անկումից հետո սկսել է թանկանալ: Արդյունքում դոլարի փոխարժեքը հուլիսի 11-ին կազմել է 479 դրամ, եվրոյինը՝ 545, ռուբլունը՝ 7 դրամ 89 լումա, ֆունտինը՝ 618 դրամ:
Հուլիսի 12-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +20+22, ցերեկը՝ +34+36 աստիճան տաքություն: