Երեւանը շատ գեղեցիկ քաղաք է։ Հուլիսի 12-ին Երեւանում կայացած մամուլի ասուլիսում հայտարարեց թուրք գրող-հրապարակախոս Զեյնել Աբիդին Քըզըլյափրաքը: Նա Հայաստան է ժամանել Հրանտ Դինքի հիմնադրամի՝ «Հաղթահարենք սահմանները» լրագրողների համար նախատեսված ծրագրի շրջանակում:
«Ես չէի պատկերացնում, որ Երեւանն այսքան գեղեցիկ քաղաք է, շլացուցիչ գեղեցիկ»,- նշեց թուրք գրողը։
Հինգ օր լինելով Հայաստանում՝ նա հանդիպել է գործընկերների, իրավապաշտպան ու հասարակական կազմակերպությունների ներկայացուցիչների հետ։ «Ուրախ եմ, որ Հայաստանում լրատվամիջոցներն ու հասարակական կազմակերպությունները «ձեռքը զարկերակի վրա են պահում»։ Ստամբուլում ինձ զգուշացրել էին, որ թուրքերեն չխոսեմ, կարող են խնդիրներ ծագել։ Ոչ միայն ոչինչ չպատահեց, այլ հակառակը՝ ինձ շատ դուր եկան մարդիկ, եւ ես միայն ջերմ վերաբերմունք եմ տեսել»,-ընդգծեց Զեյնել Աբիդին Քըզըլյափրաքը։
«Ես ցեղասպանություն վերապրած ժողովրդի երկրում եմ։ Ես ցանկանում եմ հարգել ինքս ինձ։ Հերքելով ցեղասպանության փաստը, իրերն իրենց անուններով չկոչելով՝ մարդը կորցնում է արժանապատվությունը»,-հայտարարեց գրողը։ Թուրքիային, առաջին հերթին պետությանը դիմելով, նա հավելեց, որ պետք է հարգանք վաստակել։ Մնացածը երկրորդական է։
Գրողը նշեց նաեւ թուրք հասարակության զարգացման միտումները։ «Նոր սերունդը շատ է տարբերվում։ Այն աշխարհ է տեսնում, ճամփորդում է»,- եզրափակեց նա։