ԵԱՀԿ Մինսկի խմբի համանախագահները հայտարարություն են տարածել Բրյուսելում Հայաստանի եւ Ադրբեջանի արտգործնախարարների հետ հանդիպման արդյունքներով:
Հայտարարությունում, մասնավորապես, ասվում է.
«ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) եւ Ռիչարդ Հոգլանդը (ԱՄՆ) հուլիսի 11-ին հանդիպել են Ադրբեջանի ԱԳ նախարար Էլմար Մամեդյարովի եւ Հայաստանի ԱԳ նախարար Էդվարդ Նալբանդյանի հետ՝ քննարկելու համար Լեռնային Ղարաբաղի հակամարտության լուծման հետագա աշխատանքի ընթացքը:
Այս հանդիպմանը ներկա է եղել նաեւ ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկը:
Նախարարները համաձայնության են եկել փոխանցել իրենց նախագահներին ԵԱՀԿ Մինսկի խմբի համանախագահների առաջարկը՝ կազմակերպել բարձր մակարդակի հանդիպում այս տարվա ընթացքում: Համանախագահները առաջարկել են իրենց աջակցությունը կազմակերպչական աշխատանքներում:
Քննարկվել է նաեւ շփման գծում տիրող իրավիճակը:
Նախարարները եւ ԵԱՀԿ համանախագահները հանաձայնության են եկել նորից հանդիպել սեպտեմբերին Նյու Յորքում ՄԱԿ-ի 72-րդ նստաշրջանի շրջանակներում»:
Ավելի վաղ NEWS.am-ը հայտնել էր, որ հուլիսի 11-ին Բրյուսելում կայացել է Հայաստանի եւ Ադրբեջանի արտգործնախարարներ Էդվարդ Նալբանդյանի եւ Էլմար Մամադյարովի հանդիպումը՝ ԵԱՀԿ Մինսկի խմբի համանախագահներ Իգոր Պոպովի, Ստեֆան Վիսկոնտիի եւ Ռիչարդ Հոգլանդի նախաձեռնությամբ, որին ներկա էր նաեւ ԵԱՀԿ գործող նախագահի անձնական ներկայացուցիչ Անջեյ Կասպրշիկը:
Հանդիպմանը շարունակվել ենն ղարաբաղյան կարգավորման բանակցային գործընթացն առաջ մղելու նպատակով համապատասխան պայմանների ստեղծման շուրջ քննարկումները: Նալբանդյանն ընդգծել է շփման գծում իրավիճակի կայունացման անհրաժեշտությունը ու այդ նպատակով շեշտեց Վիեննայի եւ Սանկտ Պետերբուրգի գագաթաժողովներին ձեռք բերված պայմանավորվածությունների իրագործումը: