Այս տարվա առաջին 6 ամսվա տվյալներով, Հայաստանում գրանցվել է 1499 ճանապարհատրանսպորտային պատահար, 101 զոհ, 2216 վիրավոր:
Ոստիկանության մամուլի ծառայությունից NEWS.am-ին հայտնում են, որ այդ պատահարներից 54-ի դեպքում վարորդները եղել են ալկոհոլի ազդեցության տակ։ 101 զոհերից 11-ը մահացել են ոչ սթափ վիճակում մեքենան վարած վարորդի մասնակցությամբ պատահարներից: 11 կյանք կշարունակվեր, եթե վարորդներն ալկոհոլ օգտագործելուց հետո ավելորդ ինքնավստահություն չդրսեւորեին եւ ղեկին չնստեին:
Վերջին 1,5 տարում ավտովթարների թվի նվազում է գրանցվել, փոխարենը վերջին երեք ամսում վթարների թիվն աճ է գրանցել:
Հունիսի 20-ից տեղի է ունեցել 233 ավտովթար, որի հետեւանքով վիրավորվել է 331 եւ զոհվել 22 մարդ: 22 զոհերից 11-ի պատճառը, ըստ նախնական տվյալների, արագությունը գերազանցելն է եղել, 3-ը՝ վարորդի խմածության, 4-ը՝ հանդիպակաց երթեւեկելի գոտի դուրս գալու հետեւանք է:
