Մոսկվայի շրջանային ռազմական դատարանը Բորիս Նեմցովի սպանության 5 մասնակիցների 11-20 տարվա ազատազրկման է դատապարտել, փոխանցում է «ՌԻԱ Նովոստի»-ն։
Ամենախիստ պատիժը՝ 20 տարվա ազատազրկում, դատարանը սահմանել է մարդասպան Զաուր Դադաեւի համար։ Նա զրկվել է նաեւ լեյտենանտի կոչումից։
Անզոր Գուբաշեւը, որը հանցագործին տարել է դեպքի վայրից, դատապարտվել է 19 տարվա ազատազրկման, իսկ նրա եղբայր Շադիդը՝ 16 տարվա։
Թեմիրլան Էսքերխանովը, որը հետեւել է Նեմցովին, 14 տարվա ազատազրկման է դատապարտվել, Համզաթ Բահաեւը՝ 11 տարվա ազատազրկման։ Դատարանը դատապարտյալներից յուրաքանչյուրին տուգանել է 100 հազարական ռուբլով։
Բորիս Նեմցովը սպանվել է Մոսկվայի կենտրոնում, 2015 թվականի փետրվարի 28-ին։