Տարանցիկ ուղիների բացման թեման մենք չենք քննարկում: Այս մասին հայտարարել է Վրաստանի վարչապետի՝ Ռուսաստանի հետ կապերի հարցով հատուկ ներկայացուցիչ Զուրաբ Աբաշիձեն, անդրադառնալով ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանի հայտարարությանն այն մասին, որ Հայաստանն Աբխազիայի եւ Հյուսիսային Օսիայի տարածքով Ռուսաստանի եւ Վրաստանի միջեւ առեւտրային միջանցքի բացման հույս ունի, գրում է «Գրուզիա Օնլայն»-ը:
Աբաշիձեի խոսքով՝ Ռուսաստանի եւ Վրաստանի միջեւ բանակցություններ են ընթանում բեռնափոխադրումների մոնիթորինգի մասին 2011 թվականի համաձայնագրի իրականացման թեմայով եւ լրացուցիչ որեւէ նախապայմանի մասին խոսք չկա, որոնք Հայաստանին թույլ կտան Աբխազիայի առեւտրային միջանցքի բացման հույս ունենալ:
«Հիմա մենք Ռուսաստանի հետ բանակցում ենք 2011 թվականի համաձայնագիրն ուժի մեջ մտցնելու մասին: Դրա համար շվեյցարական ընկերության (SGS) հետ պետք է պայմանագրեր կնքեն ինչպես վրացական, այնպես էլ ռուսական կողմերը: Շվեյցարացի գործընկերներն ակտիվորեն մասնակցում են այդ բանակցություններին: Պայմանագրերի կնքումից հետո եռակողմ աշխատանքային խումբ կստեղծվի, որը կհետեւի համաձայնագրի իրականացմանը»,- հայտարարեց Աբաշիձեն:
