Եվրամիությունը Հայաստանում նոր ծրագրով ցանկանում է աջակցել կանանց եւ երիտասարդների նախաձեռնություններին: Այս մասին հուլիսի 14-ին` Երեւանում կայացած ԵՄ-ի «Հավատարմություն կառուցողական երկխոսությանը» ծրագրի շնորհանդեսին ասաց Հայաստանում ԵՄ պատվիրակության ղեկավար, դեսպան Պյոտր Սվիտալսկին:
Նրա խոսքով` նրանց ձայնը ոչ միշտ է լսելի, նրանց քիչ է ուշադրություն հատկացվում: Իսկ իր հետ զրույցում երիտասարդները դժգոհել են, որ կառավարության նոր ծրագրում երիտասարդների հետ աշխատանքի մասին հիշատակվում է ընդամենը մեկ անգամ: «Իհարկե, կարեւորը բովանդակությունն է: Եվ մենք վստահ ենք, որ պետությունը շատ կշահի, եթե ակտիվ քաղաքացիների ջանքերը, այդ թվում` կանանց եւ երիտասարդների, ուղղորդի հօգուտ երկրի»,- ասաց ԵՄ պատվիրակության ղեկավարը:
Ծրագիրը նախատեսում է Երեւանում եւ մարզերում հասարակական կազմակերպությունների թրենինգներ, ինչպես նաեւ Երեւանում եւ 4 մարզկենտրոններում (Գյումրի, Վանաձոր, Գավառ, Կապան) քաղաքացիական հասարակության աջակցության կենտրոնների ստեղծում: Թրենինգ անցած ՀԿ-ները կկարողանան մասնակցել նախագծերի մրցույթներին` փոքր (մինչեւ 10 հազար եվրո), ինչպես նաեւ թիմային միջին (մինչեւ 22,5 հազար) եւ մեծ (մինչեւ 40 հազար եվրո):
