Ամենևին արդար չէ, որ Եվրոպայի մաս հանդիսացող Արցախը դուրս մնա եվրոպական ինստիտուտների ուշադրությունից: Այս մասին, այսօր՝ հուլիսի 14-ին, Արցախին եվրոպական մարդասիրական կազմակերպությունների կողմից օգնություն տրամադրելու ՀԲԸՄ միջոցառման ժամանակ այս մասին ասաց Արցախի մարդու իրավունքների պաշտպան Ռուբեն Մելիքյանը՝ հավելելով, որ Եվրոպայի ներգրավվածությունը կարևոր է առաջին հերթին քաղաքական առումով:
Նրա խոսքով, 2016 թվականի ապրիլյան դեպքերը պետք է ընդունել որպես բաժանարար գիծ. «Այդ իրադարձություններից հետո արցախյան հիմնախնդիրների նկատմամբ սփյուռքյան կառույցների ուշադրության ակնհայտ մեծացում եմ տեսնում: Դա մասնավորապես վերաբերում է Հայկական բարեգործական ընդհանուր միությանը»:
Հարցին՝ արդյոք Արցախում մարդու իրավունքները պաշտպանվո՞ւմ են եվրոպական չափորոշիչներին համապատասխան, Ռուբեն Մելիքյանը պատասխանեց. «Մենք գոնե փորձում ենք: Մեր հնարավորությունների սահմանում անընդհատ փորձում ենք իրավական դիրքորոշումներն արտահայտել, հղում անել եվրոպական իրավապաշտպան համակարգին: 2015 թվականից Արցախն իր համար պարտադիր համարեց Մարդու իրավունքների եվրոպական կոնվենցիան»: