Չինաստանը բողոք է հայտնել ՄԱԿ ԱԽ շրջանակից դուրս՝ օտարերկրյա ընկերությունների վրա միակողմանի կարգով ԱՄՆ կողմից նոր պատժամիջոցների կապակցությամբ, հայտնում է «Սինհուան»։
«Չինաստանը ամբողջովին կատարում է ՄԱԿ ԱԽ-ի Հյուսիսային Կորեայի հետ կապված բանաձեւերը»,- հայտնել է Չինաստանի ԱԳՆ ներկայացուցիչ Գեն Շուանը՝ հավելելով, որ Չինաստանը դեմ է ցանկացած պետության կողմից այսպես կոչված «երկար ձեռքի իրավազորությանը»՝ իր սեփական ներքին օրենսդրության հիման վրա։
Նրա խոսքով Չինաստանը մշտապես ջանքեր է գործադրել Կորեական թերակղզու միջուկային խնդրի լուծման ուղղությամբ, ակտիվ մասնակցել է ՄԱԿ ԱԽ-ի ՝ ԿԺԴՀ-ին վերաբերող բանաձեւերի նախագծերի շուրջ խորհրդակցություններին ու աջակցել դրանց ընդունումը։ Նա շահագրգիռ կողմերին կոչ է արել ընդառաջ գնալ միմյանց ու համատեղ ջանքեր գործադրել՝ Կորեական թերակղզու միջուկային խնդիրը երկխոսության ու խորհրդակցությունների ուղով կարգավորելու համար։
Ավելի վաղ հայտնի էր դարձել, որ Վաշինգտոնը դիտարկում է չինական բանկերի ու ընկերությունների դեմ նոր պատժամիջոցներ ձեռնարկելու հնարավորությունը։