Հայաստանի արդյունաբերության զարգացումն ապահովում է երկրի տնտեսական աճը: Այս մասին հուլիսի 15-ին` լրագրողների հետ հանդիպման ժամանակ ասաց տնտեսագետ, «Եվրասիական փորձագիտական ակումբի» անդամ Աշոտ Թավադյանը:
Նրա խոսքով` այս մասին է վկայում 2016-2017 թվականների հունվար-մայիսի տնտեսական ակտիվության ցուցանիշների համեմատությունը, աճը կազմել է 5,5 տոկոս: Դրա հետ մեկտեղ, արդյունաբերության աճը կազմել է 8,8 տոկոս:
«Ծանրագույն խնդիրներից մեկը, որը ծառացած է կառավարության առջեւ, երկրի արտաքին պարտքն է, որը մեծապես ազդում է Հայաստանում անցկացվող տնտեսական քաղաքականության վրա: Ճշտված տվյալներով` 2016 թվականին Հայաստանի համախառն արտաքին պարտքը կազմել է 5,9 մլրդ դոլար կամ ՀՆԱ-ի 56,7 տոկոսը»,- նշեց փորձագետը` հավելելով, որ նման թվերը չեն կարող տագնապ առաջացնել: Այս ամենով հանդերձ` Թավադյանը հայտարարեց, որ պաշտոնական հայտարարություններով պարտքի վճարման պայմաններն ավելի ձեռնտու են դարձել:
Նրա խոսքով` անցյալ տարի մեծացել է Հայաստանի ներքին պարտքը` 14,4 տոկոսից հասնելով 19,3 տոկոսի: Շարունակում է մեծ մնալ նաեւ արտաքին արտոնյալ պարտքերի բաժինը:
«Արդեն 2017 թվականին այս խնդիրների լուծումը կառավարությունը տեսնում է տնտեսության եւ պետական պարտքի փուլային կայունացմամբ: Ինչպես արդեն նշվել է, 2017-ից հետո կառավարությունն իր ուշադրությունը կկենտրոնացնի զարգացման քաղաքականության վրա»,- պարզաբանեց փորձագետը: