Ներքին պաշարների արդյունավետ օգտագործման եւ համաշխարհային շուկայում հայկական արտադրանքի մրցունակության մեծացման համար անհրաժեշտ է Եվրասիական տնտեսական միության շրջանակում Հայաստանի ավելի ակտիվ մասնակցություն: Այս մասին հուլիսի 15-ին` լրագրողների հետ հանդիպման ժամանակ ասաց տնտեսագետ, «Եվրասիական փորձագիտական ակումբի» անդամ Աշոտ Թավադյանը:
Նրա խոսքով` 2016 թվականին Եվրասիական տնտեսական խորհրդի հանդիպման ժամանակ Ռուսաստանի նախագահ Վլադիմիր Պուտինը ԵՏՄ անդամ երկրներին առաջարկեց մասնակցել ռուսական ներմուծման փոխարինման ծրագրին:
«Հայ ձեռնարկատերերը հնարավորություն ստացան մտնելու ԵՏՄ անդամ երկրների պետական գնումների շուկա, որը մոտ 300 մլրդ դոլար է կազմում: Սա կարող է Հայաստանի տնտեսության զարգացման համար կարեւոր օգնություն լինել»,- պարզաբանեց տնտեսագետը:
Թավադյանը նշեց, որ Հայաստանը պոտենցիալ ունի, որպեսզի իրեն համապատասխանող հատուկ դիրք գրավի երկարաժամկետ նախագծերի իրականացման համար, որոնք կապված են ինովացիոն արտադրության հետ:
«Օրինակ` Ղազախստանը պատրաստվում է մասնակցել ռուսական ներմուծման փոխարինման ծրագրին: Մասնավորապես` արդեն կազմել են արդյունաբերական ձեռնարկությունների ցանկը, որոնք պատրաստ են այս ծրագրին մասնակցել»,- հայտարարեց «Եվրասիական փորձագիտական ակումբի» անդամը:
