Փայլուն սպաներ են, զինվորներ, ովքեր գիտեն իրենց գործը: Այս մասին «Արմենիա» հեռուստաընկերության «Ռ-էվոլյուցիա» հաղորդմանը տված հարցազրույցում հայտարարել է Սերժ Սարգսյանը:
«Որեւէ մեկը կարո՞ղ է ասել, որ մեր բանակը զարգացում չի ապրել: Կարո՞ղ է ասել, որ այսօրվա մեր սպաները իրենց գրագիտության մակարդակով էապես չեն տարբերվում այն սպաներից, որոնք ծառայում էին քսան տարի առաջ՝ ե՛ւ քանակական, ե՛ւ որակական առումով: Ես հենց նոր գալիս եմ մարտական դիրքերից. փայլուն սպաներ են, զինվորներ, ովքեր գիտեն իրենց գործը»,- ասել է Սերժ Սարգսյանը:
Նախագահը խոսել է նաեւ ազգ-բանակ գաղափարախոսության մասին: «Մենք քիչ ենք թվաքանակով, եթե ուզում ենք, որ Լեռնային Ղարաբաղը եւ Հայաստանը լինեն ապահով եւ անվտանգ, անհրաժեշտության պահին յուրաքանչյուր հայ՝ անկախ սեռից, պետք է դառնա բանակի զինվոր: Երբ այդ պահը գալիս է, ազգը դառնում է բանակ:
Խաղաղ ժամանակ բանակը մասնակցում է նաեւ հայրենիքի զարգացման գործին: Շատ պարզ տրամաբանություն է: Մենք ուզում ենք այս բնագավառում հասնել առավելագույնի: Մենք ուզում ենք, որ ռազմահայրենասիրական դաստիրակությունը կարեւորվի: Ուզում ենք որպեսզի մանր-մունր դեպքերը չշահարկվեն եւ ստվեր չգցեն մեր զինված ուժերի վրա: Մենք չենք ցանկանում, որպեսզի հազարավոր բարեխիղճ, հայրենիքին նվիրված սպաների կողքին, երբ լինում է մի «շառլատան», այդ «շառլատանը» ներկայացվի որպես բանակը մարմնավորող կերպար»,- ասել է նախագահը: