Իրաքի Մոսուլ քաղաքում հակաահաբեկչական պայքարն ավարտված է կամ մոտ է ավարտին։ Այս մասին հուլիսի 17-ին լրագրողների հետ հանդիպմանն ասաց արաբագետ Հայկ Քոչարյանը։
Նրա խոսքով՝ Սիրիայում նույնպես շարունակվում է պայքարը «Իսլամական պետություն» ահաբեկչական կազմակերպության դեմ։
«ԻՊ-ի մայրաքաղաք համարվող Ռաքան ծանր կացության մեջ է՝ այն տեսանկյունից, որ մշտապես որպես թիրախ է հանդես գալիս»,-նշեց Քոչարյանը։
Արաբագետի համաձայն՝ դա փոխել է սիրիական ճգնաժամում հիմնական խաղացողների հարաբերակցությունը։ «Մյուս կողմից, պաշտոնական Դամասկոսն իրեն ավելի վստահ է զգում՝ բանակցություններում փորձելով ավելին ստանալ»,- նկատեց Հայկ Քոչարյանը։ Նա հավելեց, որ դրան զուգահեռ փոխվում է Մերձավոր Արեւելքում անվտանգության միջավայրը։
Հիշեցնենք, որ անցյալ շաբաթ Իրաքի վարչապետ Հայդեր ալ-Աբադին հայտարարել է Մոսուլում ԻՊ-ին հաղթելու մասին։ Քաղաքն ավելի քան երեք տարի ահաբեկիչների վերահսկողության ներքո էր։