Պաշտոնական տվյալներով՝ Հայաստանում բնակչության մեկ շնչին բաժին ընկնող ՀՆԱ-ն կազմել է 1 մլն 674 հազար դրամ, Արցախում՝ 1 մլն 414 հազար դրամ: Հուլիսի 17-ին լրագրողների հետ հանդիպմանն այս մասին հայտնեց Զբաղվածության եւ սոցիալական հետազոտությունների ազգային ինստիտուտի տնօրեն Արման Սարգսյանը:
Նա, միաժամանակ, նշեց, որ Արցախում գնաճը, վերջին տվյալներով, փոքր-ինչ պակաս է, քան Հայաստանում: «Արցախում միջին աշխատավարձը, պաշտոնական տվյալներով, կազմել է 151 հազար դրամ, Հայաստանում՝ 171 հազար դրամ: Սրանք 2015 թվականի տվյալներն են»,- նշեց նա:
Սարգսյանի խոսքով՝ հայկական երկու պետություններում նվազագույն աշխատավարձը նույնն է մնացել եւ կազմում է 55 հազար դրամ: Անդրադառնալով բնակչության զբաղվածության խնդրին՝ Արման Սարգսյանը նշեց, որ Հայաստանում այն կազմում է 50.9%, Արցախում՝ 54.9%: Միաժամանակ, Հայաստանում գործազրկությունը 18.5% է կազմում, Արցախում՝ 11.5%: