Կառավարության նպատակն է պաշտպանական ծախսերը ՀՆԱ-ի 4 տոկոսից ոչ պակաս մակարդակին պահելը: Այս մասին հուլիսի 17-ին կայացած մամուլի ասուլիսի ժամանակ ասաց ֆինանսների նախարար Վարդան Արամյանը՝ ներկայացնելով կառավարության 2018-2020 թվականների միջնաժամկետ ծախսերի ծրագիրը:
Նրա խոսքով՝ 2016 թվականին այս հարաբերակցությունը շատ ավելի փոքր էր ամրագրված՝ 3,71 տոկոս: Սակայն մյուս կողմից ՀՆԱ-ի աճը ծրագրված 2,2 տոկոսի փոխարեն կազմել է 0,2 տոկոս, իսկ պաշտպանական ծախսերն ամբողջությամբ պահպանվել են: «Սակայն ծրագրած 4 տոկոսի ցուցանիշը մենք կպահպանենք»,- ընդգծեց նախարարը: Ավելին՝ բացարձակ արտահայտությամբ ծրագրվում է ծախսերն այնպիսի տեմպերով մեծացնել, որոնք ՀՆԱ-ի աճից առաջ են անցնում: 2016 թվականին ծախսերը կազմել են 226 մլրդ դրամ (մոտ 470 մլն դոլար): «Մենք ցանկանում ենք այն ամեն տարի ավելացնել 26-27 մլրդ դրամով»,- հավելեց նախարարը: