2016 թվականին տնտեսական ակտիվության մակարդակն Արցախում ավելի բարձր է եղել, քան Հայաստանում: Հուլիսի 17-ին լրագրողների հետ հանդիպմանն այս մասին հայտնեց ՀՀ աշխատանքի եւ սոցիալական հարցերի նախարարության աշխատանքի եւ սոցիալական հետազոտությունների ազգային ինստիտուտի տնօրեն Արման Սարգսյանը:
Նրա խոսքով՝ հարցման ընթացքում առավելագույնս դրական միտումներ են բացահայտվել, զարգացման մեծ ներուժ, բավականաչափ տարբերակված պատասխաններ այնպիսի հարցերի, ինչպես, օրինակ՝ «Ինչպիսի՞ փոփոխություններ կցանկանայիք տեսնել երկրում»:
«Ընկերություններում, որտեղ անցկացվել է հարցումը, աշխատակիցների 37.5%-ը բարձրագույն կրթություն ունեն: Հետաքրքիր է, որ Հայաստանում անցյալ տարի այդ ցուցանիշը կազմել է 43%: Այս առումով բնական է, որ Արցախում աշխատողների զգալի մասը լրացուցիչ մասնագիտական կրթության առկայության հարց է բարձրացնում»,- նշեց Սարգսյանը: