Արցախի արտադրողների զգալի մասի՝ 72.3 տոկոսի համար հիմնական իրացման շուկան տեղականն է։ Այս մասին հուլիսի 17-ին լրագրողների հետ հանդիպման ժամանակ ասաց Զբաղվածության եւ սոցիակալան հետազոտությունների ազգային ինստիտուտի տնօրեն Արման Սարգսյանը։
Միաժամանակ, Սարգսյանի խոսքով, նրանց շուրջ 14.8 տոկոսն արտադրանքն ը իրացնում է ինչպես Արցախում, այնպես էլ Հայաստանի տարածքում։
«1.9 տոկոսն էլ արտադրանքն իրացնում է Հայաստանի տարածքում եւ այլ երկրներում։ Եվ միայն 0.6 տոկոսն է արտադրանքն արտերկրում իրացնում։ Ելնելով դրանից՝ տոկոսային հարաբերակցությամբ արտասահման արտահանվող արտադրանքի ծավալը միայն մի փոքր մասն է կազմում։ Սակայն դրական տեղաշարժեր, ամեն դեպքում, նկատելի են»,- նշեց փորձագետը։
Արման Սարգսյանի խոսքով՝ Լեռնային Ղարաբաղից արտադրանքն արտահանվում է Ռուսաստան, ԱՄՆ, Ֆրանսիա, Գերմանիա, Իտալիա, Հունաստան եւ Կուբա, ինչպես նաեւ այլ երկրներ։ Հիմնականում արտահանվում է կոնյակ, գինի, օղի, գորգեր եւ մանրատախտակ։
