News
Լրահոս
News
Երկուշաբթի
Հուլիս 24
Տեսնել լրահոսը


Մեկ տարի առաջ հուլիսի 17-ին «Սասնա ծռեր» զինված խմբի 31 անդամները գրավեցին ոստիկանության Երեւանի պարեկապահակային ծառայության գնդի տարածքը: Խումբը պահանջում էր ազատ արձակել Ժիրայր Սեֆիլյանին եւ Սերժ Սարգսյանի հրաժարականը: Գնդի գրավման ժամանակ զոհվեց ոստիկանության գնդապետ Արթուր Վանոյանը, ավելի ուշ` Գագիկ Մկրտչյանն ու Յուրի Տեփանոսյանը, 5 ոստիկան էլ պատանդառվեց, այդ թվում՝ Վալերի Օսիպյանը եւ ոստիկանության պետի տեղակալ Վարդան Եղիազարյանը:

Հուլիսի 17-ից ոստիկանությունը փակեց ՊՊԾ գնդին հարող բոլոր փողոցները: Խորենացի փողոցում ինքնաբուխ հանրահավաք սկսվեց՝ ի աջակցություն «Սասնա ծռերի»: Հուլիսի 26-ի լուսաբացին Արթուր Սարգսյանն իր մեքենան սննդամթերքով բեռնելով՝ ճեղքեց ոստիկանական շղթան եւ սնունդ հասցրեց «Սասնա ծռերին»: Հետագայում նրան «Հաց բերող» կոչեցին: Հուլիսի 29-ին ոստիկանների եւ «Սասնա ծռերին» աջակցող ցուցարարների միջեւ բախումներ գրանցվեցին Սարի թաղում եւ Խորենացի փողոցում, բերման ենթարկվեց 165 քաղաքացի: Հուլիսի 31-ին «Սասնա ծռեր» խումբը որոշում կայացրեց հանձնվել ոստիկանությանը:

Այսօր «Սասնա ծռերի» գործով 32 հոգի է անցնում: Գործով դատաքննության փուլին հասնել, սակայն, դեռեւս չի հաջողվում:

Ոստիկանության Երեւանի ՊՊԾ գնդի դիմաց այսօր մոմավառություն էր կազմակերպվել՝ ի հիշատակ գնդի գրավման օրերին սպանված ոստիկանների: «Սասնա ծռերի» աջակիցներն իրենց հերթին Ազատության հրապարակում երթ են կազմակերպել:

Սերժ Սարգսյանն «Արմենիա» հեռուստաընկերության «Ռ-Էվոլյուցիա» հաղորդաշարի վերջին թողարկման հյուրն է եղել ու խոսել արցախյան հակամարտության, բանակի, քաղաքականության, տնտեսության եւ այլ թեմաներով: Նախագահի լիազորությունների ավարտից հետո իր՝ վարչապետ դառնալու հնարավորության մասին հարցին Սերժ Սարգսյանը պատասխանել է՝ մինչեւ 2018 թվականի ապրիլը դեռ հսկայական ժամանակ կա: Նաեւ հավելել է. բազմաթիվ անգամներ ասել է, որ երբեք չի մտածել, թե որն է լինելու իր գործունեության հաջորդ ոլորտը:

Վարչապետ Կարեն Կարապետյանի գլխավորած կառավարության գործունեությունը նախագահը դրական է գնահատում, տնտեսության դրական տեղաշարժեր, նաեւ ներդրումների հնարավորություն է տեսնում: Խոսելով նախորդ կառավարությունների չիրականացած խոստումների, մասնավորապես՝ տնտեսական աճի մասին, Սերժ Սարգսյանն ընդունել է. այո՛, խոստացել են ավելին, բայց պակաս ցուցանիշ է արձանագրվել, բայց չի կարծում, որ պետք էր ցածր նշաձող դնել, իսկ հետո կուրծք ծեծել, թե ավելին ենք արել:

Սերժ Սարգսյանն աշնանը հանդիպելու է ադրբեջանցի պաշտոնակցի հետ: Սարգսյան-Ալիեւ հանդիպման մասին նախնակական պայմանավորվածություն է ձեռք բերվել մի քանի շաբաթ առաջ՝ Մինսկի խմբի համանախագահների այցի ընթացքում: Նախագահը, սակայն, այդ հանդիպումից մեծ ակնկալիքներ չունի:

Ինչ վերաբերում է շփման գծում միջադեպերին եւ ադրբեջանական սադրանքներին. Սերժ Սարգսյանը վստահեցրել է, որ ԵԱՀԿ Մինսկի խումբը գիտի, թե ով է հրադադարը խախտող կողմը, սակայն համանախագահները չեն կարող ամեն անգամ մատնանշել այդ մասին: Այդ հարցով նույնիսկ ոչ պաշտոնական միջավայրում զրուցել է եռանախագահներից մեկի հետ:

Հայաստանում ակտիվորեն քննարկում են Ռուսաստանի պետդումայի խոսնակի հայտարարությունը՝ կապված հայկական վարորդական վկայականները Ռուսաստանում ճանաչելու պայմանի հարցի հետ: Վյաչեսլավ Վոլոդինը Հայաստանի իշխանություններին առաջարկել է ռուսերենին պաշտոնական լեզվի կարգավիճակ տալ, որպեսզի ազգային վարորդական վկայականները ճանաչվեն Ռուսաստանում: Հարցը Վոլոդինի հետ հանդիպման ժամանակ բարձրացրել է Հայաստանի Ազգային ժողովի խոսնակը:

Բանն այն է, որ այս տարվա հունիսի 1-ից Ռուսաստանում ուժի մեջ է մտել օտարերկրյա վարորդական վկայական ունեցող վարորդներին երկրի տարածքում աշխատելն արգելող օրենքը, իսկ հուլիսի 14-ին Պետդուման օրենք է ընդունել, որի համաձայն՝ այն երկրների քաղաքացիներին, որտեղ ռուսերենը պաշտոնական լեզու է, թույլատրվում է Ռուսաստանի տարածքում վարորդ աշխատել ազգային վարորդական վկայականներով։ Բաբլոյանն ընդգծել է, որ Հայաստանի քաղաքացիները փաստացի հետին պլան են մղվում: Վոլոդինը հակադարձել է. օրենսդրության մեջ ռուսերենը որպես պաշտոնական լեզու ամրագրեք եւ հայ վարորդները նույնպես կկարողանան աշխատել Ռուսաստանում: Արա Բաբլոյանն էլ հայտարարել է. Հայաստանի օրակարգում նման հարց չկա եւ չի էլ սպասվում:

Արդարադատության նախկին նախարար Գեւորգ Դանիելյանը խելամիտ կապ չի տեսնում վարորդական վկայականի եւ Հայաստանում ռուսերենին պաշտոնական կարգավիճակ տալու միջեւ: Նա նաեւ վկայակոչել է Սահմանադրության 20-րդ հոդվածը, որի համաձայն՝ «Հայաստանի Հանրապետության պետական լեզուն հայերենն է»: Սա, ըստ Դանիելյանի, Սահմանադրության այն հոդվածներից է, որը կարող է փոփոխվել բացառապես հանրաքվեի միջոցով:

Ռուսաստանում Լենա գետում միջանցիկ ջրանցքում Հայաստանի քաղաքացի է խեղդվել: Փրկարարները դուրս են բերել 21-ամյա Նարեկ Հակոբյանի դին: Երիտասարդը Լոռու մարզի Սպիտակ քաղաքից էր, քառօրյա պատերազմի մասնակից: Նա սոցիալապես անապահով ընտանիքից էր: Մեկ տարի առաջ էր ավարտել զինվորական ծառայությունը, իսկ երեք ամիս առաջ Ռուսաստան էր մեկնել՝ արտագնա աշխատանքի, հիվանդ մոր բուժման համար գումար վաստակելու: Նարեկ Հակոբյանի մարմինը Հայաստան են տեղափոխելու՝ այստեղ հողին հանձնելու համար:

Իջեւանի բժշկական կենտրոնում նորածին է մահացել: Երեխայի հարազատները կատարվածի համար բժիշկներին են մեղադրում: Մահացած երեխայի մայրը՝ 23-ամյա Էլինա Սաղոյանը, ծննդատուն է ընդունվել հուլիսի 14-ի առավոտյան: Էլինայի հայրը պնդում է, որ բժիշկները ձգձգել են նախածննդաբերական շրջանը, որպեսզի երեխան բնական ճանապարհով լույս աշխարհ գա, մինչդեռ կարող էին կեսարյան հատում անել: Արտավազդ Սաղոյանի խոսքով՝ հղիության 9 ամիսների ընթացքում 23-ամյա Էլինան անցել է անհրաժեշտ բոլոր հետազոտությունները, որեւէ խնդիր կամ բարդություն բժիշկները չեն արձանագրել: Երեխան երիտասարդ զույգի առաջնեկն էր: Հավելենք, որ Իջեւանի բժշկական կենտրոնի տնօրենը հրաժարվել է մեկնաբանություններից՝ հորդորելով սպասել քննության ավարտին:

Լոռու մարզում նախօրեին որոտացած կայծակը լուրջ վնասներ է պատճառել Օձունի բազմաթիվ տների: Համայնքում տների տանիքներ ու ապակիներ են կոտրվել, հոսանքալարեր են վնասվել ու այրվել: Տներից մեկում կայծակի հարվածից հեռուստացույցն օդ է բարձրացել ու մեկ մետր հեռու ընկել, փչացել են սառնարանը, գազօջախը, համակարգիչն ու լվացքի մեքենան: Կայծակի հետեւանքով վնասվել են նաեւ մի քանի տների էլեկտրաէներգիայի եւ գազի հաշվիչները՝ հրդեհի պատճառ դառնալով: Վնասի չափը ճշտելու համար հանձնաժողով է ստեղծվել:

Երեւանում հուլիսի 16-ին գույների տոն էր: Մայրաքաղաքում արդեն երրորդ անգամ անցկացվեց գունազարդ վազքը՝ Yerevan Color Run-ը: Այս տարի առաջին անգամ միջոցառումը կազմակերպվել էր Հանրապետության հրապարակում: Կազմակերպիչները հավաստում են, որ միջոցառմանը մասնակցել ցանկացողների թիվը տարեցտարի ավելանում է:

Հուլիսի 17-ին դոլարը շարունակել է թուլանալ, փոխարենը եվրոն թանկացել է եւս 2 դրամով: Դոլարի փոխարժեքն արդյունքում կազմել է 478 դրամ, եվրոյինը՝ 548, ռուբլունը՝ 8 դրամ 9 լումա, ֆունտինը՝ 625 դրամ:

Հուլիսի 18-ին հանրապետությունում սպասվում է առանց տեղումների եղանակ: Օդի ջերմաստիճանը 2-3 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +20+22, ցերեկը՝ +36+38 աստիճան տաքություն: https://news.am/arm/news/400734.html

Եվ մեկ նախազգուշացում ԱԻՆ-ից. հուլիսի 19-22-ը հանրապետությունում սպասվում է բարձր ջերմային ֆոն, առկա է հրդեհավտանգ իրավիճակ: Օդի միջին օրական ջերմաստիճանն այդ օրերին նորմայից բարձր կլինի 5-7 աստիճանով:

Տպել
Կարդացեք նաև
Ամբողջ
Օրվա գլխավոր լուրերը՝ «մեկ տողով». 21.07.2017
Ռուսաստանում մահվան ելքով վթարի պատճառ դարձած հայ վարորդ Հրաչյա Հարությունյանին փոխանցեցին Հայաստանին...
Օրվա գլխավոր լուրերը՝ «մեկ տողով». 20.07.2017
Ոչ մաքրասեր քաղաքացիներին կստիպեն հետեւել քաղաքի մաքրությանը. փողոցում ծխախոտ նետելու համար 16 հազար դրամ տուգանք է սահմանվելու...
Օրվա գլխավոր լուրերը՝ «մեկ տողով». 19.07.2017
Դանակահարված հայտնի հոգեբան Ռուբեն Պողոսյանի վիճակը բժիշկները ծայրահեղ ծանր են գնահատում...
Օրվա գլխավոր լուրերը՝ «մեկ տողով». 18.07.2017
Գորիսում 4-րդ հարկից ընկած 4 տարեկան երեխան թոքերի սալջարդ եւ աջ երիկամի վնասվածք ունի...
Օրվա գլխավոր լուրերը՝ մեկ տողով․ 14․ 07․ 2017
Եգիպտական հայտնի կուրորտային ափին՝ Հուրգադայում, ողբերգական դեպք է տեղի ունեցել․․․
Օրվա գլխավոր լուրերը՝ «մեկ տողով». 13.07.2017
Սամվել Բաբայանը շրջանառությունից հանված եվրո թղթադրամներ է բերել Հայաստան, նաեւ իր ծանոթներից մեկին դրդել ապօրինի կերպով «ԻԳԼԱ» համալիր ձեռք բերել. ԱԱԾ-ն նոր տեսանյութ է հրապարակել...
Ամենաշատ
Partner news