Ինքնահռչակ Դոնեցկի Ժողովրդական հանրապետության ղեկավար Ալեքսանդր Զախարչենկոն հայտարարել է Մալոռոսիա պետության ստեղծման մասին՝ Ուկրաինայի փոխարեն, որը «ցույց է տվել իր անկարողությունը», փոխանցում է «ՌԻԱ Նովոստի»-ն։
«Կիեւի ռեժիմն ի վիճակի չէ դադարեցնել քաղաքացիական պատերազմը, առաջարկում ենք հիմնել Մալոռոսիա պետությունը։ Մալոռոսիան երիտասարդ անկախ պետություն է՝ մինչեւ 3 տարի անցումային շրջանով»,- լրագրողներին ասել է Զախարչենկոն։
Նրա խոսքով՝ նոր անկախ պետության հիմնադրումը կօգնի դադարեցնել Դոնբասի հակամարտությունը։
Այս լուրին արձագանքել է Ուկրաինայի նախագահ Պյոտր Պորոշեկոն։ Նա հիշեցրել է, որ «Նովոռոսիա» նախագիծը քննարկման ենթակա չէ՝ խոստանալով վերականգնել ինքնիշխանությունը Դոնբասի եւ Ղրիմի նկատմամբ։ ՈՒՆԻԱՆ-ի փոխանցմամբ՝ այս մասին Twitter-ի իր էջում գրել է Պորոշենկոյի մամուլի քարտուղար Սվյատոսլավ Ցեգոլկոն։