Աշխարհում փաստացի գոյություն ունի առնվազն երկու քրդական պետություն. մեկը Հյուսիսային Իրաքի, մյուսը՝ Սիրիայի տարածքում է։ Այս մասին հուլիսի 18-ին լրագրողների հետ հանդիպման ժամանակ ասաց թուրք-քրդական հակամարտության փորձագետ Կարեն Հովհաննիսյանը։
Նրա խոսքով՝ Սիրիայի տարածքում ձեւավորված քրդական պետությունը վերջերս է ստեղծվել։ «Մայիսից սկսած եւ սիրիացի, եւ իրաքցի քրդերը սկսել են զբաղվել սեփական պետության ձեւավորմամբ։ Դրանով հանդերձ՝ Իրաքյան Քուրդիստանը թուրքական իշխանությունների հետ բավական լավ հարաբերություններ ուներ։ Համենայն դեպս, նրա ղեկավարության հետ»,-նշեց Հովհաննիսյանը։
Սակայն փորձագետը նկատեց, որ Թուրքիայի եւ Իրաքյան Քուրդիստանի միջեւ հարաբերությունները կտրուկ վատթարացան՝ Հյուսիսային Իրաքի տարածքում սեպտեմբերին անկախության հանրաքվե անցկացնելու լուրերից հետո։ «Ամենահետաքրքիրն այն է, որ քրդական իշխանությունների այդ հայտարարությանն արձագանքեցին ոչ թե Իրաքի կենտրոնական իշխանությունները, այլ Թուրքիան՝ Էրդողանի գլխավորությամբ»,-ասաց նա։
Կարեն Հովհաննիսյանը շատ հավանական է համարում քրդական պետության ստեղծումը կամ թեկուզ ապագայում միավորումը։ Որպես օրինակ՝ նա խոսել է Հաքարի նահանգի մասին, որը Թուրքիայի հարավ-արեւելքում է եւ սահմանակից է Իրանին ու Իրաքին։ Այդ տարածքում համեմատաբար վերջերս Թուրքիայից անկախ քրդական միավորում ստեղծելու փորձ ձեռնարկվեց, որը հրաժարվեց թուրքական լիրաներ օգտագործելուց, բանկոմատների ծառայություններից եւ այլն։
«Որպես պատիժ՝ թուրքական իշխանությունները փորձեցին չվճարել տվյալ տարածքում բանկվող մարդկանց աշխատավարձերն ու կենսաթոշակները։ Թուրքական իշխանություններին հաջողվեց հայտնաբերել, ապա վերահսկողության տակ վերցնել կամ արտաքին աշխարհից առհասարակ մեկուսացնել առաջնորդներին, որոնք կազմակերպել ու գլխավորել են Հաքարիի ակցիան»,-հավելեց փորձագետը։