«Կազտրանսգազ Թբիլիսի» գազաբաշխիչ ընկերության բաժանորդների համար գազի սակագինը բարձրացել է խորանարդ մետրի համար մինչեւ 46,153 թեթրի՝ ԱԱՀ-ով, հայտնում է Rustavi2-ը:
Սակագնի բարձրացման որոշումն ընդունել է Վրաստանի էներգետիկայի եւ ջրամատակարարման ազգային կարգավորող հանձնաժողովը՝ գազաբաշխիչ ընկերության հայտի հիման վրա: Սակագինը կբարձրանա 2017 թվականի հուլիսի 20-ից եւ կգործի մինչեւ 2018 թվականի դեկտեմբերի 31-ը:
Ներկայումս Թբիլիսիում բնական գազի սակագինը կազմում է 1 խ.մ.-ի դիմաց 45,62 թեթրի: Թբիլիսիում մեկ ընտանիքը գազի դիմաց վճարելու համար միջինը ձմռանը մինչեւ 200 լարի է ծախսում, իսկ ամռանը՝ մինչեւ 50 լարի:
Ձմռան շրջանում գազի մեծ ծախսերը կապված են այն հանգամանքի հետ, որ Թբիլիսիում կենտրոնական ջեռուցման եւ տաք ջրի մատակարարման կենտրոնացված համակարգեր չկան, եւ երկրի բնակիչներն իրենց տները ջեռուցում են գազով աշխատող տաքացնող սարքերով եւ ջրատաքացուցիչներից են օգտվում: