Գորիսում դժբախտ դեպք է տեղի ունեցել. 4 տարեկան երեխան ընկել է շենքի 4-րդ հարկի բնակարանի պատուհանից: Փոքրիկին մարմնական վնասվածքներով հիվանդանոց են տեղափոխել: Հարեւանները մեր թղթակցին պատմել են, որ երեխան տանը մենակ է մնացել: Մայրը դուրս է եկել տնից՝ ջուր բերելու, փոքրիկը մոտեցել է պատուհանին՝ մորը կանչելու համար, բայց պատուհանի ցանցը բացվել է ու երեխան ցած է ընկել: Երեխային ծանր վիճակում Երեւան են տեղափոխել: Երեխան գլխի շրջանում վնասվածք, թոքերի սալջարդ եւ աջ երիկամի վնասվածք ունի: Երեւանյան հիվանդանոցից տեղեկացրեցին, որ նրա վիճակում արդեն դրական տեղաշարժ կա:
Դեբեդ գետում խեղդված կնոջ դին հայտնաբերել են Տավուշի մարզի Այրում քաղաքի տարածքում: 81-ամյա Ռոզա Վերմիշյանը Վանաձորի բնակիչ է: Հուլիսի 17-ին նա դստեր՝ 56-ամյա Սեդա Վարդանյանի հետ անցել է գետը՝ իրենց այգին մշակելու: Վերադառնալիս մայրը սայթաքել ու ընկել է գետը: Դուստրը փորձել է բռնել մորը, բայց չի կարողացել: Կնոջ մարմինը երեկվանից որոնում էին, մութն ընկնելուց հետո որոնողական աշխատանքները դադարեցրել են, իսկ այսօր տարեց կնոջ դին գտել են մի քանի տասնյակ կիլոմետր հեռու:
Սանահինում վանդալիզմ է տեղի ունեցել. վանական համալիրում երկու պատմական տապանաքարեր են քանդել եւ դրանց տեղում նոր հուղարկավորություն կազմակերպել: Ֆեյսբուքի օգտատերերից մեկը գրել է, որ համալիրին հարող տարածքում` Զաքարյան իշխանների դամբարանի հարեւանությամբ, պատմական տապանաքարերը մի կողմ են շպրտել, իսկ դրանց տեղում նոր գերեզմաններ են հայտնվել: Վանդալիզմը չեն կարողացել կանխել նույնիսկ տեղի հոգեւորականները: Մշակույթի նախարարությունից NEWS.am-ին հայտնեցին, որ տապանաքարը քանդվել է առանց նախարարության թույլտվության: Գերատեսչությունն արդեն դիմել է համապատասխան մարմիններին՝ փորձելով հասկանալ, թե ինչպես է հնարավոր վերականգնել հասցված վնասը: Իրավիճակից ելք չգտնելու դեպքում նախարարությունը կդիմի նաեւ իրավապահ մարմիններին:
Ֆրանսիայի՝ մեծությամբ երրորդ քաղաք Լիոնն այսուհետ կղեկավարի 68-ամյա Ժորժ Քեփենեկյանը: Նրան այդ պաշտոնում առաջադրել էր Լիոնի նախկին քաղաքապետ Ժերար Կոլոմը: Լիոնի քաղաքային խորհրդի 72 անդամներից հայազգի թեկնածուի օգտին քվեարկել է 49-ը: Ժորժ Քեփենեկյանը մասնագիտությամբ բժիշկ է: 1990-ական թվականներին նա մի քանի անգամ այցելել է Հայաստան եւ Արցախ, բարդ վիրահատություններով բազմաթիվ կյանքեր փրկել:
«Հրաշագործ» անունով ու զորությամբ հայտնի 15-րդ դարի Ավետարանը հանգրվանեց Մատենադարանում: 1471 թվականին Երուսաղեմում գրված Ավետարանը շուրջ մեկ դար Դադայան ընտանիքի սրբությունն է եղել, սերնդեսերունդ փոխանցվելով՝ հասել է Հրայր եւ Հռիփսիմե Դադայաններին: Ձեռագիրը Դադայան գերդաստանի մեծ մորը՝ Եղսային, 1918 թվականին Երեւանում փոխանցել է Գոդառիճ գյուղից գաղթած մի հայ. Ավետարանը դարեր շարունակ պահվել է այս գյուղի Սուրբ Գեւորգ եկեղեցում: Եղսայի թոռնուհի Հռիփսիմե Դադայանն ասում է՝ արդեն ազատ Հայաստան ունենք, եւ Ավետարանը պետք էր վերադարձնել ժողովրդին:
Դոլարի փոխարժեքը շարունակում է նվազել, եվրոն թանկացել է եւս 4 դրամով: Արդյունքում դոլարի փոխարժեքը հուլիսի 18-ին կազմել է 478 դրամ, եվրոյինը՝ 552, ռուբլունը՝ 8 դրամ 10 լումա, ֆունտինը՝ 624 դրամ:
Հուլիսի 19-ին հանրապետությունում տեղումներ չեն սպասվում: Օդի ջերմաստիճանը 1-2 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +23+25, ցերեկը՝ +38+39 աստիճան տաքություն: