ԵՏՀ խորհուրդն առաջարկում է դիմել Ռուսաստանին՝ երկրի տարածքում տրանսպորտի ոլորտում օտարերկրյա վարորդական իրավունքներով աշխատելու արգելքը ԵՏՄ անդամ պետությունների քաղաքացիների վրա չտարածելու խնդրանքով, գրում է «Կոմերսանտը»։

ԵՏՀ խորհրդի նախագահ, Ղրղզստանի Հանրապետության փոխվարչապետ Օլեգ Պանկրատովը հայտնել է «առանձին համաձայնագրով այս հարցը կարգավորելու պայմանավորվածության առկայության մասին, որպեսզի դա չհակասի ԵՏՄ սկզբունքներին ու աշխատանքի ընդհանուր շուկայի գաղափարին»։ Նրա խոսքով կշարունակվի մշակվել համաձայնագիր, որը կսահմանի միասնական կանոններ՝ ազգային վարորդական իրավունքների փոխադարձ ճանաչման համար։

Բացի դրանից ԵՏՀ խորհուրդը առաջարկում է Ռուսաստանին խնդրել փոփոխություններ անել համապատասխան օրենքում՝ բացառելով արգելքի տարածումը ԵՏՄ անդամ պետությունների քաղաքացիների վրա։

Նման նորմա, ինչպես հայտնել են ԵՏՀ-ում, արդեն գործում է Ղազախստանում։ Հուլիսի 14-ին ուժի մեջ է մտել Ղազախստանի օրենքը, որի համաձայն օտարերկրա իրավունքներով մեքենա վարելու արգելքը չի տարածվում ԵՏՄ անդամ պետությունների վրա։

Հիշեցնենք, որ 2017-ի հուլիսի 1-ից Ռուսաստանում ուժի մեջ է մտնում օրենք, որը արգելում է օտարերկրյա վարորդական իրավունքներով վարորդներին աշխատել երկրի տարածքում՝ տրանսպորտի ոլորտում։ Հուլիսի 14-ին Պետդուման ընդունել է օրենք, ըստ որի այն երկրների քաղաքացիներին, որտեղ ռուսաց լեզուն պաշտոնական կարգավիճակ ունի (Բելառուսը, Ղազախստանը, Ղրղզստանը) իրավունք է տրվում վարորդ աշխատել Ռուսաստանի տարածքում՝ ազգային վարորդական իրավունքների հիման վրա։

Այդ կապակցությամբ նախօրեին Պետդումայի խոսնակ Վյաչեսլավ Վոլոդինը Հայաստանի իշխանություններին առաջարկել էր ռուսաց լեզվին պաշտոնական կարգավիճակ տրամադրել, որպեսզի ազգային վարորդական իրավունքները ընդունելի լինեն Ռուսաստանի տարածքում։