Երեւանում հուլիսի 17-ին «ԱՅԳ» հոգեբանական կենտրոնի տնօրեն Ռուբեն Պողոսյանի դանակահարության մեջ կասկածվող 34-ամյա Հրանտ Հ.-ին, NEWS.am-ի տեղեկություններով բերման են ենթարկել, ապա ստորագրությամբ ազատ արձակել մինչեւ դատաբժշկական փորձաքննությունների ավարտը:

Ավելի վաղ NEWS.am-ը հայտնել էր, որ հուլիսի 17-ին, ժամը 14.45-ին, հիվանդանոցից ոստիկանության Կենտրոնականի բաժնում հաղորդում է ստացվել, որ «դեմքի կտրած վերք, բազմաթիվ վերքեր, արյունահոսություն» ախտորոշմամբ բուժօգնության է տեղափոխվել «ԱՅԳ» հոգեբանական կենտրոնի տնօրեն 70-ամյա Ռուբեն Պողոսյանը:

Պարզվել է, որ նույն օրը, ժամը 14.00-ին, Մաշտոցի պողոտայի 40 շենքում գործող հոգեբանական կենտրոնում 34-ամյա Հրանտ Հ.-ն թուղթ կտրելու դանակով հարվածներ է հասցրել Ռուբեն Պողոսյանի դեմքին և գլխին՝ պատճառելով վնասվածքներ:

Հիվանդանոցից NEWS.am-ին հայտնել են, որ տուժողի մոտ առկա է եղել առատ արյունահոսություն եւ ծանր աստիճանի հեմոռագիկ շոկ: Նրան անմիջապես տեղափոխել են վիրահատարան, որտեղ օգնություն են ցուցաբերել դիմածնոտային վիրաբույժները եւ այլ նեղ մասնագետներ: «Նրա վիճակը ծանրանում էր արյան մեծ կորստի պատճառով, որի հետեւանքով նրա մոտ զարգացել էր կրկնակի ծանր ինֆարկտ»,-հայտնել են հիվանդանոցից՝ հավելելով, որ այս պահին Ռուբեն Պողոսյանի վիճակը գնահատվում է կրիտիկական ծանր:

Նախնական տեղեկություններով՝ հարձակվողը հոգեկան խնդիրներ է ունեցել։