Արարատի մարզում, այսօր՝ հուլիսի 19-ին, ականի պայթյունից վիրավորված զինծառայող 29-ամյա Արթուր Զախարյանին այս պահին վիրահատում են: Այս մասին NEWS.am-ին հայտնեց Հայաստանի ՊՆ ռազմաբժշկական վարչության պետ, գնդապետ Կամավոր Խաչատրյանը:
«Վնասվել է զինծառայողի ոտքը: Բժիշկներն ամեն հնարավորն անում են զինծառայողի վերջույթը պահպանելու համար: Հիմա նրան վիրահատում են»,-ասաց նա՝ հավելելով, որ նրա վիճակը կայուն է:
Ավելի վաղ NEWS.am-ը հայտնել էր, որ Հայաստանի զինված ուժերի Արարատի գնդի պայմանագրային զինծառայողներից մեկն այսօր՝ հուլիսի 19-ին, ժամը 13.30-ի սահմաններում ականի պայթյունի հետևանքով վիրավորվել է:
Այս առնչությամբ ՀՀ Քննչական ծառայությունից հայտնել էին հետեւյալը. «Ժամը 13.50-ի սահմաններում N զորամասի տարածքում պայմանագրային զինծառայողը մարտական երթուղուց շեղվել է եւ ստացել բեկորային վնասվածք ոտքի սրունքի շրջանում: Նա անմիջապես տեղափոխվել է բժշկական կենտրոն եւ բուժօգնություն է ստանում: Այս պահին դեպքի վայրում աշխատում է քննչական խումբը, քննություն է տարվում, հանգամանքները պարզվում են»: