2017 թվականի 1-ին եռամսյակում Հայաստան զբոսաշրջային այցելությունները աճել են 18,2 տոկոսով: Այս մասին հուլիսի 19-ին՝ լրագրողների հետ հանդիպման ժամանակ ասաց Տնտեսական զարգացման եւ ներդրումների նախարարության Տուրիզմի պետական կոմիտեի ղեկավար Զարմինե Զեյթունցյանը:
Նրա խոսքով՝ 2017 թվականի առաջին 3 ամիսներին Հայաստան է ժամանել գրեթե 300 հազար զբոսաշրջիկ (298,5 հազար): Ամենամեծ թվով զբոսաշրջիկներ են ժամանել Ռուսաստանից, նաեւ հարեւան Վրաստանից եւ Իրանից: Միեւնույն ժամանակ, ավելի շատ տուրիստներ են սկսել գալ Հայաստանի համար համեմատաբար նոր ուղղություններից՝ Իրաքից, Ուզբեկստանից եւ Թուրքմենստանից, ինչպես նաեւ Կանադայից եւ Իսպանիայից: «Հետազոտվում են Հնդկաստանի, Չինաստանի եւ Ճապոնիայի հետ կապեր հաստատելու հնարավորությունները»,- հավելեց նա: