Թաիլանդում, մարդկանց առեւտրի մասին գործով խոշորագույն դատավարության ընթացքում արդեն դատապարտվել են 103 մեղադրյալներից 38-ը։ Մոտ ժամանակներս ակնկալվում են նաեւ մյուս դատավճիռները, հայտնում է DW-ն։
Որոշ մեղադրյալներ մեղավոր են ճանաչվել ոչ միայն մարդկանց առեւտրի համար, այլեւ վերազգային կազմակերպված հանցավորության, մահացու ելքերով ապօրինի ազատազրկման ու բռնաբարությունների համար։
Բանգկոկում դատարանի առաջ կանգնածների շարքերում են բանակային գեներալ, բարձրաստիճան ոստիկանական սպաներ, տեղային մակարդակի քաղաքական գործիչներ ու նրանց կապավորները Մյանմարից։ 103 մեղադրյալներին մեղադրում են հարեւան Մյանմարից մահմեդական փախստականների առեւանգելու ու մինչեւ փրկագինը ստանալը Թաիլանդի ու Մյանմարի սահմանին ճամբարում սարսափելի պայմաններում նրանց պահելու մեջ։
Իշխանությունները հայտնաբերել էին հանցավոր խմբավորման հետքը 2015-ի սկզբին այն բանից հետո, երբ երկու երկրների սահմանին գտնվող ջունգլիներում հայտնաբերվել են տասնյակ զոհված փախստականների մարմիններով գերեզմանափոսեր։ Հետագայում քննիչները գտել էին ավելի քան 70 լքված ճամբարներ։ 2015-ի աշնանը սկսված դատավարությունը մռայլվել էր զանգվածային կտտանքներով, ականատեսների, թարգմանիչների ու քննչական մարմինների աշխատակիցների ահաբեկումով։