Հայաստանի զինված ուժերի Արարատի գնդում ականի պայթյունի հետեւանքով պայմանագրային զինծառայող է վիրավորվել: 29-ամյա Արթուր Զախարյանը զորամասի տարածքում շեղվել է մարտական երթուղուց եւ ականի պայթյունի հետեւանքով բեկորային վնասվածք ստացել ոտքի սրունքի հատվածում: Հիվանդանոց տեղափոխված Զախարյանին վիրահատել են, նրա կյանքին վտանգ չի սպառնում, վնասված ոտքը կկարողանան պահպանել:
Արցախի Ազգային ժողովը հատուկ նիստում Բակո Սահակյանին վերընտրել է հանրապետության նախագահի պաշտոնում: Նիստին ներկա 32 պատգամավորներից նրա օգտին քվեարկել է 28 պատգամավոր, 4 ձայն էլ ստացել է մյուս թեկնածուն՝ «Շարժում 88» խմբակցության ղեկավար, Ստեփանակերտի նախկին քաղաքապետ Էդուարդ Աղաբեկյանը: Բակո Սահակյանն Արցախի անցումային ժամանակաշրջանի նախագահն է լինելու 2017-2020 թվականներին՝ մինչեւ խորհրդարանի լիազորությունների ժամկետի ավարտը: Նոր Սահմանադրությամբ՝ դրանից հետո նախագահի համապետական ընտրություններ կանցկացվեն ու Արցախը կանցնի նախագահական կառավարման մոդելի:
Երեւանում արտակարգ դեպք է տեղի ունեցել: Իր աշխատասենյակում դանակահարել են «ԱՅԳ» հոգեբանական ծառայությունների կենտրոնի ղեկավար, հայտնի հոգեբան Ռուբեն Պողոսյանին: Նրան ծանր վիճակում հիվանդանոց են տեղափոխել: 70-ամյա Պողոսյանը բազմաթիվ վնասվածքներ է ստացել դեմքի, գլխի եւ վերին վերջույթների շրջանում: Բժիշկների տեղեկացմամբ՝ նրա մոտ առատ արյունահոսություն է եղել,ինչի հետեւանքով կրկնակի ծանր ինֆարկտ է զարգացել: Տուժածի վիճակը մասնագետները ծայրահեղ ծանր են գնահատում:
Հոգեբանին դանակահարելու կասկածանքով 34-ամյա տղամարդու են բերման ենթարկել, իսկ հետո ստորագրությամբ ազատ արձակել՝ մինչեւ դատաբժշկական փորձաքննության ավարտը: Նախնական տեղեկություններով՝ հարձակվողը հոգեկան խնդիրներ ունի:
Վայոց ձորի մարզում ողբերգական պատահարի հետեւանքով 4-ամյա տղա է մահացել: Երեխան Արենի գյուղի մոտ Արփա գետում խեղդվել է: Փոքրիկը ծնողների հետ հանգստանալու էր գնացել Արենի: Խեղդված երեխան Արարատի մարզի Լուսառատ գյուղից էր: Ընտանիքն այսօր մեկնել էր Արենի՝ Արփա գետի մոտ խնջույքի: Այդ ժամանակ էլ տղան գետն է մտել ու խեղդվել:
Ֆիրդուսի շուկայի ապամոնտաժման աշխատանքները սկսվել են: Քաղաքապետարանի աշխատակիցներն այսօր շուկայի տարածք էին եկել հատուկ տեխնիկայով: Առեւտրով զբաղվողները փորձել են խոչընդոտել քանդման աշխատանքներին, ինչի հետեւանքով ոստիկանների հետ քաշքշուկ է տեղի ունեցել: Բողոքը, սակայն, արդյունք չի տվել, եւ առեւտրականները ստիպված են եղել փակել տաղավարները: Պնդում են, որ քաղաքապետարանը իրենց այլընտրանքային տարբերակ չի առաջարկել, իրենք գոնե մինչեւ տարեվերջ ժամանակ են խնդրում: Ֆիրդուսի բնակիչները մտավախություն ունեն, որ սա միայն սկիզբն է: Տոնավաճառը կքանդեն, իսկ հետո նաեւ իրենց կհանեն տներից:
Ֆիրդուսի բնակիչներն ասում են՝ շուրջ երկու ամիս առաջ նամակ են գրել քաղաքապետ Տարոն Մարգարյանին, բայց մինչեւ հիմա պատասխան չեն ստացել: Երեկ էլ նամակ են ուղարկել նախագահի աշխատակազմին: Այսօր բնակիչներից մի քանիսը նախագահական նստավայր են գնացել՝ խնդրելու, որ հնարավորինս շուտ ուսումնասիրեն: Նախագահի աշխատակազմի աշխատակիցը խոստացել է շտապ արձագանքել ֆիրդուսցիների նամակին: Իսկ շուկայի աշխատակիցները հայտարարում են. եթե իրենց խնդրին լուծում չտան, ցույցերի են դուրս գալու:
Դոլարի անկումը վերջապես կանգ է առել, իսկ եվրոն երկարատեւ վերելքից հետո էժանացել է: Դոլարի փոխարժեքը հուլիսի 19-ին կազմել է 478 դրամ, եվրոյինը՝ 551, ռուբլունը՝ 8 դրամ 10 լումա, ֆունտինը՝ 623 դրամ:
Հուլիսի 20-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +23+25, ցերեկը՝ +39+40 աստիճան տաքություն: