Իսրայելը չի մեկնաբանում բլոգեր Ալեքսանդր Լապշինի դատավճիռը: Այս մասին ի պատասխան NEWS.am-ի հարցմանը հայտարարեց Իսրայելի ԱԳՆ մամուլի քարտուղար Էմանուել Նահշոնը:
«Մենք այս հարցը չենք մեկնաբանում»,- կարճ պատասխանեց ԱԳՆ ներկայացուցիչը:
Նշենք, որ Ռուսաստանի նախագահի մամուլի քարտուղար Դմիտրի Պեսկովը նույնպես չի պատասխանել բլոգերի հնարավոր արտահանձնման մասին հարցին:
Ավելի վաղ բլոգեր Լապշինն Ադրբեջանում 3 տարվա ազատազրկման է դատապարտվել: «ՌԻԱ Նովոստի»-ի հետ զրույցում Լապշինի փաստաբան Էդուարդ Չերնինը նշել է, որ իր պաշտպանյալը կարող է պատիժը կրել այլ երկրում: Մասնավորապես՝ դա կարող է լինել Իսրայելը, Ռուսաստանը եւ Ուկրաինան, քանի որ նա այս երկրների քաղաքացի է:
2016 թվականի վերջին Լապշինը Մինսկում ձերբակալվել էր Ադրբեջանի հարցման համաձայն, որը նրան «սեւ ցուցակի» մեջ էր ընդգրկել առանց Բաքվի համաձայնության Լեռնային Ղարաբաղի Հանրապետություն այցելելու պատճառով: Բելառուսի գլխավոր դատախազությունը որոշում էր ընդունել Ադրբեջանի հարցումը բավարարելու եւ Լապշինին հանձնելու մասին: