Թուրքիան պետք է իր ձեռքերը հեռու պահի արցախյան հիմնահարցից : Այս մասին այսօր՝ հուլիսի 20-ին, ՀՀԿ ԳՄ նիստից հետո ասել է ՀՀԿ խոսնակ Էդուարդ Շարմազանովը՝ անդրադառնալով Թուրքիայի արտաքին գործերի նախարար Մեւլութ Չավուշօղլուի՝ հայկական ուժերն Արցախից դուրս բերելուն առնչվող հայտարարությունը: Շարմազանովը նշեց, որ Չավուշօղլուն մի երկրի ներկայացուցիչ է, որը ժխտում է Հայոց ցեղասպանությունը, որի պառլամենտում ազգային փոքրամասնություն ներկայացնող պատգամավորներին ծեծի են ենթարկում, ինչպես 100 տարի առաջ Գրիգոր Զոհրապին:
«Թուրքիան պետք է իր ձեռքերը հեռու պահի արցախյան հիմնահարցից: Թուրքիան անելիք չունի այստեղ, եւ այդ երկիրը մի օր, ուզի, թե չուզի, պետք է ճանաչի Արցախի Հանրապետությունը, որպես միջազգային սուբյեկտ, որովհետեւ աշխարհը գնում է ինքնորոշման իրավունքի հաղթարշավի ճանապարհով: Եւ եթե խոսում է օկուպացիայից, պետք է օր առաջ դուրս բերի իր զորքերը օկուպացված Կիպրոսից, որն, ի դեպ, ԵՄ անդամ երկիր է»,- ասաց նա:
