Հայաստանի Հանրապետության արտաքին գործերի նախարարությունը ճշտում է՝ Հունաստանում գրանցված ավերիչ երկրաշարժի հետեւանքով ՀՀ քաղաքացիներ կամ ազգությամբ հայեր տուժե՞լ են, թե ոչ:
NEWS.am-ի հետ զրույցում ՀՀ ԱԳՆ մամուլի քարտուղար Տիգրան Բալայանը, մասնավորապես, նշեց. «Արտաքին գործերի նախարարությունն այս պահին ճշտում է, թե արդյոք տուժածների մեջ հայեր կամ ՀՀ քաղաքացիներ կան, թե ոչ: Մենք Հունաստանի Կոս կղզում ունենք փոքրաթիվ հայկական համայնք եւ այս պահին փորձում ենք տվյալներ ստանալ: Եթե ինչ-որ բան հայտնի լինի, կտեղեկացնենք»:
Ավելի վաղ NEWS.am-ը հայտնել էր, որ այսօր՝ հուլիսի 21-ին, տեղական ժամանակով ժամը 02:31-ին (Գրինվիչի ժամանակով` հուլիսի 20-ին 22:31-ին) ՀՀ ԱԻՆ Սեյսմիկ պաշտպանության ծառայության սեյսմոլոգիական ցանցի կողմից գրանցվել է հյուսիսային լայնության 36.780 եւ արեւելյան երկայնության 27.310աշխարհագրական կոորդինատներով (Հունաստան-Թուրքիա սահմանային գոտի, Կոս կղզուց 5 կմ հարավ-արեւելք), օջախի 10 կմ խորությամբ, 6.6 մագնիտուդով երկրաշարժ:
Ստորգետնյա ցնցման ուժգնությունը էպիկենտրոնում կազմել է 9 բալ:
Ըստ նախնական տվյալների կայքերում զետեղված տեղեկության Հունական Կոս կղզում մահացել է երկու եւ տուժել՝ մոտ 120 մարդ եւ եւս 70-ը՝ հարակից կղզիներում:
ՏԱՍՍ-ի փոխանցմամբ, էպիկենտրոնը գտնվել է Բոդրում հայտնի հանգստավայրից 12 կմ հեռավորության վրա, հունական Հռոդոս կղզուց 90 կմ հեռավորության վրա:
Երկրաշարժն առաջացրել է ոչ մեծ ցունամի։ Ստորգետնյա ցնցումները զգացվել են Էգեյան ծովի ողջ թուրքական ափի երկայնքով։ Բոդրումի մի քանի հին շենքերի վրա ճեղքեր են առաջացել։ Քաղաքի որոշ շրջաններում տեղի է ունեցել էլեկտրականության անջատում։
Երկրաշարժից վախեցած մի քանի բնակիչներ դուրս են նետվել պատուհաններից եւ աննշան վնավածքներ ստացել: Ճաքեր են առաջացել նաեւ Բոդրումի պետական հիվանդանոցի շենքի վրա. հիվանդները տարհանվել են։
Նշենք, որ զբոսաշրջային ակտիվ կենտրոն համարվող հունական Կոս կղզում հզոր երկրաշարժ է տեղի ունեցել, ինչի հետևանքով մասամբ վնասվել են շինություններ, հզոր ստորգետնյա ցնցումների հետևանքով զոհվել է 2 մարդ, մինչդեռ վիրավորների թիվն անցել է 120-ը: Նշվում է, որ 6.5 մագնիտուդ ուժգնությամբ երկրաշարժը տեղի է ունեցել գիշերը՝ տեղի ժամանակով 1:30-ին: