Երեւանի Շենգավիթ վարչական շրջանի ընդհանուր իրավասության դատարանում այսօր՝ հուլիսի 21-ին, Ժիրայր Սեֆիլյանի եւ մյուսների գործով դատական նիստում դատավոր Տաթեւ Գրիգորյանը հայտարարեց, որ փաստաբաններ Արա Զաքարյանի և Նինա Կարապետյանցի վարքագծի հետ կապված սանկցիա է կիրառում նրանց նկատմամբ, մասնավորապես, փաստաբաններին պատասխանատվության ենթարկելու դիմումով դիմել է Փաստաբանների պալատ:
Պատճառն այն է, որ հիշյալ փաստաբանները դատական նիստի հենց սկզբում հայտարարեցին, որ առանց իրենց պաշտպանների ներկայության չեն մասնակցի դատական նիստին եւ լքեցին դահլիճը:
Դրանից հետո, դատարանի դահլիճ հրավիրվեց ամբաստանյալներից Գալուստ Գրիգորյանը, որպեսզի նրա համար հանրային պաշտպան ներգրավվի: Դատավոր Տաթեւ Գրիգորյանը հանրային պաշտպան առաջարկեց Աննա Ջուվանովային, սակայն Գալուստ Գրիգորյանը հրաժարվեց հանրային պաշտպանի ծառայություններից՝ նշելով. «Հրաժարվում եմ հանրային պաշտպանից, ինձ պաշտպան պետք չէ, եթե պաշտպանի կարիք ունենամ, ապա կմիջնորդեմ»:
«Եթե անգամ դուք հրաժարվեք պաշտպանից, միևնույն է, քրեադատավարական օրենսգրքի համաձայն՝ միևնույն է, պաշտպան ներգրավվելու է»,- ասաց դատավորը, ինչին ամբաստանյալն արձագանքեց. «Բա էլ ինչի՞ եք ինձ հարցնում»:
Ու թեեւ դատավորը որպես հանրային պաշտպան ներգրավեց Ջուբվանովային, սակայն վերջինս նույնպես լքեց նիստերի դահլիճը՝ հայտարարելով, որ չի կարող պաշտպանություն իրականացնել ամբաստանյալի կամքին հակառակ, հատկապես նրա բացակայությամբ:
Դատարանում դարձյալ ընդմիջում է հայտարարվել:
Հիշեցնենք, որ Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Բացի Սեֆիլյանից, մեղադրանք է առաջադրվել նաեւ Գեւորգ Սաֆարյանին, Ներսես Պողոսյանին, Գալուստ Գրիգորյանին, Հրայր Թոփչյանին, Սասունիկ Կիրակոսյանին եւ Հովհաննես Պետրոսյանին:
Այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն անցկացվում են արտագնա` Շենգավիթ վարչական շրջանի ընդհանուր իրավասության դատարանում: