Երեւանի Շենգավիթ վարչական շրջանի ընդհանուր իրավասության դատարանում այսօր՝ հուլիսի 21-ին, Ժիրայր Սեֆիլյանի եւ մյուսների գործով այսօրվա դատական նիստն ավարտվեց: NEWS.am-ի թղթակիցը հաղորդում է, որ դատավոր Տաթեւ Գրիգորյանը հայտարարեց, որ դատական նիստը հետաձգվում է Ժիրայր Սեֆիլյանի պաշտպան Արա Զաքարյանի եւ Ներսես Պողոսյանի պաշտպան Նինա Կարապետյանցի՝ նիստերին չներկայանալու պատճառով:
Վերջիններս հայտարարել էին, որ առանց իրենց պաշտպանյալների ներկայության չեն մասնակցի դատական նիստերին: Դատավորը նրանց նկատմամբ սանկցիա կիրառեց:
Այնուհետեւ դատավոր Տաթեւիկ Գրիգորյանը հանրային պաշտպան ներգրավեց ամբաստանյալ Գեւորգ Սաֆարյանի պաշտպանության համար, սակայն վերջինս հրաժարվեց՝ նշելով, որ իր պաշտպանը Տիգրան Եգորյանն է եւ ինքը չի հրաժարվում իր պաշտպանից:
Տիգրան Եգորյանին նկատմամբ դատական սանկցիա էր կիրառվել՝ նիստերին չներկայանալու պատճառաբանությամբ:
Դատական հաջորդ նիստը տեղի կունենա հաջորդ ուրբաթ հուլիսի 28-ին:
Նշենք, որ այս գործով մեղադրվում են Ժիրայր Սեֆիլյանը, Գևորգ Սաֆարյանը, Հրայր Թոփչյանը, Սասունիկ Կիրակոսյանը, Հովհաննես Պետրոսյանը, Գալուստ Գրիգորյանը, Ներսես Պողոսյանը:
Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Բացի Սեֆիլյանից, մեղադրանք է առաջադրվել նաեւ Գեւորգ Սաֆարյանին, Ներսես Պողոսյանին, Գալուստ Գրիգորյանին, Հրայր Թոփչյանին, Սասունիկ Կիրակոսյանին եւ Հովհաննես Պետրոսյանին:
Այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն անցկացվում են արտագնա` Շենգավիթ վարչական շրջանի ընդհանուր իրավասության դատարանում: