Ադրբեջանի հետ Հայաստանի եւ Արցախի սահմաններին տիրող իրավիճակը կապված չէ Արցախում անցկացված ընտրությունների հետ: Հուլիսի 21-ին լրագրողների հետ հանդիպմանն այս մասին հայտարարեց Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
Փորձագետի խոսքով՝ Ադրբեջանը վաղուց է որոշել ռազմաքաղաքական ճնշում գործադրել հայկական կողմի վրա: «Պարզ ասած՝ դրանք այս կամ այն ձեւաչափով կրակոցներն են: Ժամանակ առ ժամանակ բռնության բռնկում է գրանցվում սահմաններին»,- պարզաբանեց քաղաքագետը:
Ըստ Իսկանդարյանի՝ Ադրբեջանը հասկանում է, որ լայնածավալ պատերազմ սկսելու հնարավորություն չունի, միաժամանակ, Բաքվում կարծում են, որ հիմնախնդիրն անհնար է լուծել բանակցությունների ճանապարհով:
Հիշեցնենք, որ հուլիսի 19-ին Արցախում անցումային շրջանի նախագահ ընտրեցին: Ազգային ժողովը հատուկ նիստում այդ պաշտոնում 28 «կողմ» ձայնով ընտրեց գործող նախագահ Բակո Սահակյանին: