Տավուշի մարզի առաջինից չորրորդ դասարանի աշակերտները սեպտեմբերից կապահովվեն տաք սնունդով: «Կայուն Դպրոցական սնունդ» ծրագիրը կշարունակվի մինչեւ 2018 թվականը: Այս մասին այսօր համաձայանագիր կնքեցին ԿԳ նախարար Լեւոն Մկրտչյանը եւ ՄԱԿ-ի Պարենի համաշխարհային ծրագրի հայաստանյան ներկայացուցչության ղեկավար Պասկալ Միշոն:
ԿԳՆ-ից NEWS.am-ին հայտնում են, որ ծրագրի գործողության ժամկետն ավարտվել էր 2017 թվականի հունիսի 30-ին, այժմ այն երկարաձգվում է մինչեւ 2018 թվականի դեկտեմբերի 31-ը: «Զուգահառեբար պատրաստվում է նաեւ «Կայուն դպրոցական սննուդ» ծրագրի ռազմավարությունը, որը ներառում է ծրագրի շարունակականությունն ու զարգացումը մինչեւ 2025 թվականը: Դպրոցական սննդի ծրագիրը մեր ամենահաջողված նախաձեռնություններից է, որն ունի ոչ միայն սոցիալական կարեւորություն, այլ նաեւ դաստիարակչական լուրջ միջոցառում է, որը դպրոցական վաղ տարիքում ձեւավորում է համակեցության շատ կարեւոր կանոններ»,- ստորագրման արարողությունից հետո հայտարարել է ԿԳ նախարար Լեւոն Մկրտչյանը:
Կարեւորելով կատարված համատեղ աշխատանքը՝ ԿԳ նախարարն ընդգծել է, որ դպրոցական սննդի ծրագիրը հաջողված ընթացք եւ հասարակության կողմից դրական ընկալում ունի, հաշվի առնելով, որ հասարակությունն ինքը ծրագրի շահառուն եւ մասնակիցն է: Նախարարը բարձր է գնահատել Պարենի համաշխարհային կազմակերպության դերակատարումը՝ սկսած «Կայուն դպրոցական սնունդ» ծրագրի ներմուծումից ՀՀ դպրոցներ մինչեւ ծրագրի ընդլայնում եւ տեխնիկական աջակցություն: ԿԳ նախարարի տեղեկացմամբ ՀՀ կառավարության կողմից ստեղծվել է նաեւ «Կայուն դպրոցական սնունդ» հիմնադրամ, որն այսուհետ համակարգելու է դպրոցական սննդի կազմակերպման աշխատանքները՝ առաջնահերթ դիտարկելով առաջինից չորրորդ դասարանցիների տաք սննդի ապահովումը, ինչպես նաեւ ծրագրի ազգային փուլի ընդլայնումը:
«Կայուն դպրոցական սնունդ» ծրագիրը Հայաստանում մեկնարկել է 2010 թվականից, ՀՀ կառավարության եւ ՄԱԿ-ի Պարենի համաշխարհային ծրագրի միջեւ ձեռքբերված պայմանավորվածությամբ, որի շրջանակում ՀՀ բոլոր մարզերի / Երեւանը ծրագրում ներառված չէ/ տարրական դասարանների աշակերտները դպրոցում ստանում են սնունդ:
2014-2015 թթ. ՀՀ Արարատի, Վայոց Ձորի եւ Սյունիքի մարզերի բոլոր դպրոցները փոխանցվել են ՀՀ Կառավարության «Կայուն դպրոցական սնունդ» ծրագրի իրականացման պատասխանատվության ներքո: 2017թ. սեպտեմբերից եւս մեկ մարզ՝ Տավուշի մարզը, կընդգրկվի ՀՀ Կառավարության «Կայուն դպրոցական սնունդ» ծրագրում: 2018 թվականի սեպտեմբերից ծրագրի ազգային փուլում կընդգրկվի 5-րդ մարզը՝ Շիրակը, իսկ մնացած 5 մարզերում դպրոցական սննդի ծրագիրը կիրագործվի Պարենի համաշխարհային ծրագրի ֆինանսական աջակցությամբ: ՄԱԿ-ի Պարենի համաշխարհային ծրագրի հայաստանյան ներկայացուցչության ղեկավար Պասկալ Միշոյի տեղեկացմամբ՝ Հայաստանի դպրոցների համար իբրեւ դոնոր երկիր հանդես է գալիս ՌԴ կառավարությունը, որի ֆինանսական մասնակցությունը ծրագրին մինչեւ 2018 թվականը կկազմի 35,61 մլն դոլար:
ՄԱԿ-ի Պարենի համաշխարհային ծրագրի հայաստանյան ներկայացուցչության ղեկավարը, կարեւորելով ՀՀ կառավարության հետ համագործակցությունը, ընդգծել է, որ ծրագիրն իրագործվել է ի շահ Հայաստանի երեխաների՝ հավատացած լինելով, որ նրանք երկրի ապագան են. «Մեր վստահության պատճառը կառավարության բարձր հանձնառությունն է՝ պահպանելու ազգային ծրագրի որակը: Այն մարզերում, որտեղ ծրագիրն իրագործվում է ՀՀ կառավարության միջոցներով, ՊՀԾ-ն շարունակում է աջակցել տեխնիկական եւ խորհրդատվական հարցերում: Մենք ակնկալում ենք բեղմնավոր եւ երկարատեւ համագործակցություն»,- ընդգծել է Պ. Միշոն:
Այս տարվա համար ծրագրի թիրախը հանդիսանում են նախակրթարաններում եւ տարրական դասարաններում սովորող 60.000 երեխաները, ովքեր սովորում են ՀՀ վեց մարզերի շուրջ 600 դպրոցներում: Նրանց սնունդ կտրամադրվի տարեկան 180 օր, շաբաթական 5 օր մինչեւ 2018թ. հունիս ամիսն ընկած ժամանակահատվածում:
Համաձայնագրով նախատեսվում է «Դպրոցական սնունդ» հիմնադրամի միջոցով իրականացնել դպրոցական սննդի ծրագրում ընդգրկված դպրոցների անձնակազմերի կարողությունների բարելավում, գործնական նախապատրաստում, տեխնիկական բազայի համալրում, ինչպես նաեւ ծրագրի ազգային փուլի ընդլայնում: