Ղարաբաղյան հակամարտությունը միջազգային հանրության օրակարգի հիմնական թեման չէ, քանի որ արցախյանի նման հակամարտություններն աշխարհում ավելի քան 50-ն են: Հուլիսի 21-ին լրագրողների հետ հանդիպմանն այս մասին հայտարարեց Կովկասի ինստիտուտի տնօրեն, քաղաքագետ Ալեքսանդր Իսկանդարյանը:
Փորձագետի խոսքով՝ այդ առումով Արցախը ո՛չ առաջին, ո՛չ էլ երկրորդ տեղում է: «Չգիտեմ, թե որ տասնյակում է ղարաբաղյան հակամարտությունը որպես առաջնահերթություն: Պետք չէ մտածել, որ Սիրիայի եւ Ուկրաինայի այժմյան իրադրության ֆոնին աշխարհն այդ ամենը կթողնի եւ կսկսի զբաղվել ղարաբաղյան հիմնախնդրով»,- նշեց քաղաքագետը:
Ըստ քաղաքագետի՝ իրավիճակը գրեթե նույնը կմնա: «Աշխարհն Արցախում աշխատում է քաղաքական գործիքներով, եւ այդ գործիքները բավարար չեն: Այլ գործիքներով աշխարհը չի աշխատելու»,- ամփոփեց Իսկանդարյանը:
