Լեռնային Ղարաբաղի նկատմամբ համաշխարհային տերությունների, մասնավորապես Ռուսաստանի կողմից կիրառվող երկակի ստանդարտները համաշխարհային քաղաքականության մեջ նորմա են: Այս մասին հուլիսի 21-ին՝ լրագրողների հետ հանդիպման ժամանակ ասաց Կովկաս ինստիտուտի տնօրեն, քաղաքագետ Ալեքսանդր Իսկանդարյանը:
Փորձագետի կարծիքով՝ սա բնական վարքագծ է, որը գործնականում հատուկ է բոլոր պետություններին: «Աշխարհում ամենուր կարելի է սրա հետ բախվել: ԱՄՆ-ն Չինաստանի հետ մի ստանդարտով է խոսում, Գվատեմալայի հետ՝ այլ, Ռուսաստանի հետ՝ երրորդ, Լյուքսեմբուրգի հետ՝ չորրորդ»,- արձանագրեց քաղաքագետը:
Ինչպես նշեց Իսկանդարյանը, նույն սկզբունքով է գործում նաեւ Հայաստանը: «Հայաստանը պետք է տարբեր երկրների հետ տարբեր կերպ աշխատի: Այլ կերպ չի կարող լինել: Դե, իհարկե, Ռուսաստանն Ադրբեջանում իր շահերն ունի, եւ նա պատրաստ չէ հանուն Հայաստանի այս շահերը ոչնչացնել: Սակայն նա պատրաստ չէ նաեւ հանուն Ադրբեջանի իր շահերը ոչնչացնել Հայաստանում»,- ընդգծեց Իսկանդարյանը: