Այս աշնանը Հայաստանի եւ Ադրբեջանի նախագահների առաջիկա հանդիպումից չարժի մեծ ակնկալիքներ ունենալ: Այս մասին հուլիսի 21-ին՝ լրագրողների հետ հանդիպման ժամանակ ասաց Կովկաս ինստիտուտի տնօրեն, քաղաքագետ Ալեքսանդր Իսկանդարյանը:
Նրա խոսքով՝ ԵԱՀԿ Մինսկի խմբի համանախագահերը հիմնականում զբաղված են բռնության մակարդակի նվազեցմամբ եւ Լեռնային Ղարաբաղում շփման գծում հետագա թեժացման կանխարգելմամբ: «Հանդիպումից պետք է հանդիպում սպասել: Արդեն երկար տարիներ մինսկյան գործընթացը չի զբաղվում ղարաբաղյան հակամարտության կարգավորման փորձերով: Այն զբաղվում է հակամարտության մենեջմենթի փորձով»,- նշեց փորձագետը:
Իսկանդարյանն ընդգծեց, որ այսօրվա դրությամբ չի կարելի ակնկալել Վիեննայի կամ Սանկտ Պետերբուրգի համաձայնագրերի կատարում, չնայած կողմերը փորձում են դա անել: «Ադրբեջանի վրա ճնշում է գործադրվում, սակայն Բաքուն ակնհայտորեն չի ցանկանում այս համաձայնագրերը կատարել»,- նշեց Կովկաս ինստիտուտի տնօրենը՝ հավելելով, որ չնայած այս ճնշման ամբողջ լրջությանը, որ գործադրվում է Ադրբեջանի վրա, այն ակնհայտորեն անբավարար է պատշաճ ներգործություն ունենալու համար:
