Ռուսաստանում կոնվերտապլանները եւ ծանր անօդաչուները ստեղծվում են զինվորականների շահերի շրջանակում: Այս մասին լրագրողներին հայտնել է ՌԴ Օդատիեզերական ուժերի գլխավոր հրամանատար, գեներալ-գնդապետ Վիկտոր Բոնդարեւը, փոխանցում է ՏԱՍՍ-ը:
«Ռուսաստանում աշխատանքներն ընթանում են բոլոր ուղղություններով՝ ե՛ւ փոքր, ե՛ւ միջին, ե՛ւ մեծ անօդաչուներ, ե՛ւ կոնվերտապլաններ»,- ասել է նա:
Գեներալի խոսքով՝ ապագայում անօդաչուները կարող են մտնել կառավարման միասնական համակարգի մեջ եւ «երամով» գործել:
«Անօդաչուների թեման զարգանում է: Ինչ էլ լինի, օդաչուին սովորեցնելն ավելի թանկ է, քան օդանավի մեջ լավ ավտոպիլոտ տեղակայելը: Եթե արդեն հիմա օպերատորը կարող է կառավարել 1-2 անօդաչու, ապա ժամանակի ընթացքում վերգետնյա բաղադրիչի զարգացմանը զուգահեռ՝ նա կկարողանա 5, երբեմն էլ 10 սարք կառավարել, այս պատճառով դա ավելի էժան կլինի»,- ասել է նա:
Հիմա կոնվերտապլաններ կան ամերիկյան զինվորականների սպառազինության մեջ, որոնք օգտագործում են V-22 Osprey-ի զանազան տարբերակներ: Հաղորդվում է, որ Ճապոնիան մտադիր է ԱՄՆ-ից նման օդանավեր գնել:
