«ժառանգություն» կուսակցությունը իշխանափոխություն չի նախաձեռնի, եթե ընդդիմադիր գործընկերները նախաձեռնեն, «ժառանգությունը» կմիանա։ Այս մասին NEWS.am–ի հետ  զրույցում ասել է «ժառանգություն» կուսակցության փոխնախագահ Արմեն Մարտիրոսյանը։

Հիշեցնենք, որ «ժառանգության»  առաջնորդ Րաֆֆի Հովհաննիսյանը բոլորովին վերջերս հայտարարեց, որ եթե 2018 թվականից հետո Սերժ Սարգսյանը շարունակի ղեկավարել երկիրը, ապա թավշյա հեղափոխության գործընթաց են սկսելու։ 

«Ես միայն մի բանի եմ սպասում, հասարակությունը կցանկանա՞,  թե՞ չի ցանկանա փոփոխություն անել,  հասարակության մեջ չկա տրամադրություն իշխանափոխություն իրականaցնելու։ Հասարակության որոշելիքն է՝  ցանկանում է այսպե՞ս ապրել, թե՞ որեւէ բան փոխել։  Մենք միշտ պատրաստ ենք  եղել պայքարելու, Րաֆֆի Հովհաննիսյանը ցանկացած պահի պայքարի ելել է»,–ասել է Արմեն Մարտիրոսյանը՝  ընդգծելով, որ եթե ընդդիմադիր ուժերը նախաձեռնեն նման գործընթաց, իրենք կմիանան։

«Մենք չենք նախաձեռնում։ Եթե մեր գործընկերները իսկապես կցանկանան, մենք կմիանանք։ Մենք չենք նախաձեռնելու, բայց մենք շատ ակտիվ մասնակից կարող ենք լինել։ Մենք գաղափարն ասել ենք , որից հետո արդեն որոշ հատվածներից, ընդ որում ոչ թե իշխանության, այլ ընդդիմության կողմից հարվածներ են գալիս, իրենք  թող որոշեն՝ ինչ են անելու, Րաֆֆի Հովհաննիսյանը խնդիր չունի։ Մենք մի խնդիր ունենք, փորձենք երկրում իրավիճակ փոխել, եթե մեր ընդդիմադիր  գործընկերները, հայրենակիցները կողմ կլինեն՝ կփոխենք, ոչ՝ ոչ»։