Չի կարելի համեմատել Ռուսաստանն ու զենք արտադրող կորպորացիաները, որոնք զենք են վաճառում՝ ելնելով իրենց բիզնեսի շահերից: Հուլիսի 22-ին լրագրողների հետ հանդիպմանն այս մասին հայտարարեց արցախյան պատերազմի մասնակից Գագիկ Դանիելյանը:
Նրա խոսքով՝ մասնավոր կորպորացիաները պայքարում են իրենց գոյության համար: «Յուրաքանչյուրն իր արտադրանքն իրացնելու խնդրի առջեւ է կանգնած: Այլ հարց է, որ պետությունը կարող է ազդել այդ կազմակերպությունների գործունեության վրա, մասնավորապես՝ ղարաբաղյան հակամարտության գոտում»,- նշեց նա:
Փորձագետը բնական է համարում, որ Ռուսաստանը փորձում է տարբեր շուկաներում իրացնել իր արտադրանքը:
«Նրանք պարտավոր են դա անել: Դա բիզնեսի օրենքն է: Նրանք պետք է վաճառեն իրենց զենքը, եւ ոչ միայն Ադրբեջանին»,- նշեց Դանիելյանը:
Միաժամանակ, փորձագետն ընդգծեց, որ Ադրբեջանը կարող է զենք ձեռք բերել նաեւ սեւ շուկայում, բայց այդ դեպքում դժվար կլինի հետեւել, թե ինչ սպառազինություն է գնել այդ երկիրը եւ ինչ քանակությամբ:
«Այսպես գոնե կարելի է վերահսկել մատակարարումները: Հայտնի է, թե ինչ զենք է գնել Ադրբեջանը եւ ինչ ծավալով: Ելնելով դրանից՝ մեր պետությունն ու համապատասխան մարմինները կարող են հակազդել դրան»,- պարզաբանեց Գագիկ Դանիելյանը: