Նյու Ջերսի նահանգի Մոնտկլերե քաղաքում վաճառքի են հանելու տունը, որտեղ ապրել են 2010 թվականին ԱՄՆ իշխանությունների կողմից Ռուսաստանի օգտին լրտեսության մեջ մեղադրվող ռուսաստանցիները: Այս մասին գրում է ՏԱՍՍ-ը՝ վկայակոչելով NJ.com-ը:
Երկհարկանի տունը 700 հազար դոլար է գնահատվել: North N.J. House Buyers LLC ընկերությունը, որի համասեփականատերը ներդրող Ջերեմի Մաքդոնալդն է, տունը գնել է հունիսին, 340 հազար դոլարով:
Մաքդոնալդը լրագրողներին հաղորդել է, որ մտադիր է 200 հազար դոլարով նորոգել տունը, իսկ հետո 700 հազար դոլարով վաճառել: Ներդրողը նշել է, որ տեղյակ չի եղել, որ այդ տանն ապրել են տեղի բնակիչներին Ռիչարդ եւ Սիտիա Մերֆի անունով հայտնի Վլադիմիր ու Լիդիա Գուրեւները:
Նրանք ձերբակալվել են 2010 թվականին՝ ութ այլ անձանց հետ միասին: Բոլորին մեղադրում են Ռուսաստանի օգտին լրտեսության մեջ: Նրանց հետագայում փոխանցել են ռուսական կողմին՝ Ռուսաստանում պետական դավաճանության մեջ մեղադրվող չորս անձանց դիմաց: