Հնդկաստանը երրորդ տեղն է զբաղեցրել 2016 թվականի արդյունքներով մահվան ելքով ահաբեկչական հարձակումների ամենամեծ թվով երկրների ցանկում: Ահաբեկչության եւ ահաբեկչությանն արձագանքման հետազոտական ազգային կոնսորցիումի (START) հետազոտության համաձայն, որն անցկացվել է ԱՄՆ Պետքարտուղարության պատվերով, Հնդկաստանը զիջում է միայն Իրաքին եւ Աֆղանստանին, նույնիսկ Պակիստանից է առաջ անցել:

ՏԱՍՍ-ը նշում է, որ 2016 թվականին աշխարհում իրականացված 11 072 ահաբեկչական հարձակումներից 927-ը բաժին է ընկել Հնդկաստանին, որը 16 տոկոսով ավելի է, քան 2015 թվականին (798): Դրանց ընթացքում մահվան դեպքերը 17 տոկոսով աճել են՝ 2015 թվականի 289 դեպքից մինչեւ 337 դեպք 2016 թվականին, վիրավորների թիվը նույն ժամանակահատվածում մեծացել է 500-ից մինչեւ 636 մարդ: Միեւնույն ժամանակ Պակիստանում գրանցվել է ահաբեկչական հարձակումների 27 տոկոսով նվազում՝ 2015 թվականի 1010-ից մինչեւ 734 հարձակում 2016-ին:

Զեկույցում նշվում է, որ Հնդկաստանում ահաբեկչական հարձակումների մոտ երկու երրորդը կազմակերպել են ձախ ծայրահեղականները՝ նակսալիտները: START-ի գնահատմամբ՝ նակսալիտ մաոիստների շարժումը զոհերի թվով դարձել է աշխարհում երրորդ ահաբեկչական խմբավորումը՝ «Իսլամական պետություն» խմբավորումից եւ «Թալիբան» շարժումից հետո, առաջ անցնելով անգամ նիգերական «Բոկո հարամ»-ից: