Եթե հինգ տարի առաջ Հայաստանում ծնված երեխաների հարաբերակցությունը 100 աղջկա պարագայում 115 տղա էր, հիմա այս հարաբերակցությունը փոխվել է. 100 աղջիկ՝ 112 տղայի դիմաց: Հուլիսի 24-ին լրագրողների հետ հանդիպմանն այս մասին հայտարարեց «Մարդկային զարգացման միջազգային կենտրոն» հասարակական կազմակերպության զարգացման եւ հետազոտությունների բաժնի ղեկավար Վահագն Ասատրյանը՝ ներկայացնելով 2016 թվականի վերջից մինչեւ 2017-ի սկիզբն անցկացված հետազոտության արդյունքները:
Նրա խոսքով՝ դա վկայում է այն մասին, որ աղջիկների եւ տղաների թվի հարաբերակցությունում շեղումները կրճատվել են: Հարցմանը մասնակցել են 19-49 տարեկան կանայք:
«Եթե 2011 թվականին կանայք նշում էին, որ հասարակության 60%-ը նախապատվությունը տալիս է տղաներին, ապա 2017-ին այդ ցուցանիշը կազմել է 36.7%: Եթե 2011-ին հարցին, արդյո՞ք ընտանիքում նախընտրում են տղա ունենալ, դրական էր պատասխանում կանանց 45%-ը, ապա 2017-ին այդ ցուցանիշը կազմել է ընդամենը 12.9%»,- նշեց Ասատրյանը: