Թեեւ Հայաստանի պատկան մարմինները հայտարարում են, որ ինչպես հարեւան Վրաստանում, այնպես էլ Հայաստանում, հնարավոր է կազմակերպել ամառային մատչելի հանգիստ, սակայն, Հայաստանում եւ Վրաստանում զբոսաշրջային փաթեթների առաջարկած գները միանգամայն այլ բան են ասում:
Մասնավորապես, եթե փորձենք հայտնի Booking.com կայքի օգնությամբ հյուարոնոցային համարներ ամրագրել Հայաստանի եւ Վրաստանի համադրելի քաղաքներում, կստանանք հետեւյալ պատկերը. Եթե Սեւանում մեկ անձի՝ երկտեղանոց հյուրանոցում նախաճաշով մնալը մեկ օրվա համար սկսվում է 32 դոլարից, ապա Բաթումիում նույն պայմաններով հյուրանոց կարելի է գտնել ընդամենը 15 դոլարով, Ջերմուկում երկտեղանոց հյուրանոցը նախաճաշով մեկ անձի համար սկսվում է 50 դոլարից, իսկ Բորժոմիում՝ 40, Բակուրիանիում՝ 54 դոլարից, իսկ Ծաղկաձորում՝ 83, Երեւանում եւ Թբիլիսիում հյուրանոցները սկսվում են 100 դոլարից:
ՀՀ զբոսաշրջության պետական կոմիտեի նախագահի առաջին տեղակալ Մեխակ Ապրեսյանը համաձայն չէ այն կարծիքի հետ, թե հարեւան Վրաստանում ամառային հանգստի կազմակերպումն ավելի մատչելի է քան Հայաստանում: Նրա խոսքով, հասարակության մեջ ձեւավորված կարծիքը, թե Հայաստանում հանգստի կազմակերպումն ավելի թանկ է, քան արտերկրում, տեղեկատվության պակասի արդյունք է. «Հայաստանում եւ Արցախում կան հանգստի կազմակեպման լայն առաջակներ եւ գնային, եւ որակական առումով»:
Մեխակ Ապրեսյանի խոսքով, հայերը նախընտրում են հանգստանալ հարեւան Վրաստանում, քանի որ ծովային հանգիստ են գերադասում, որը Հայաստանը չի կարող առաջարկել:
«Գիտենք, որ Հայաստանում չկա ծով, ունենք հրաշալի Սեւան, ինչը ծով չէ: Դրա համար էլ հայերը հիմնականում գնում են ծովային հանգիստ առաջարկող երկրներ»,-NEWS.am-ի հետ զրույցում ասում է նա:
Ապրեսյանի խոսքով, նախորդ տարիների համեմատ Հայաստանի եւ Արցախի տարածքում ներքին զբոսաշրջությունն աճել է, ինչը վկայում է, որ աճել է առաջարկվող ծառայությունների որակը եւ ավելացել առաջարկվող փաթեթների գնային մրցունակությունը. «2015թ. համեմատ 12.4 տոկոսով աճել է ներքին զբոսաշրջությունը, իսկ այս տարի առաջին եռամսյակին ավելի քան 20 տոկոսով աճել է ներքին զբոսաշրջությունը՝ նախորդ տարվա նույն ժամանակահատվածի հետ համեմատած»:
Նշենք, որ Վրաստանը դրականորեն տարբերվում է նաեւ ավիատոմսերի գների առումով: Հայաստանում ավիատոմսերի գները 15-20 տոկոսով ավելի թանկ են, քան հարեւան Վրաստանում: Այդ է պատճառը, որ ՀՀ շատ քաղաքացիներ Եվրոպա հանգստի մեկնելիս հաճախ նախընտրում են մեկնել Թբիլիսի եւ այնտեղից օդանավ նստել, ինչը լրացուցիչ դժվարություններ է ստեղծում մարդկանց համար:
