Իրանի միջուկային ծրագրի շուրջ համաձայնության ձեռքբերումից հետո փոխգործակցության եւ հայ-իրանական համատեղ ծրագրերի իրականացման նոր հնարավորություններ են բացվել: Հուլիսի 24-ին լրագրողների հետ հանդիպմանն այս մասին հայտարարեց իրանագետ Արմեն Իսրայելյանը:
Նրա խոսքով՝ վերջին երկու տարիներին տնտեսական ոլորտում մի շարք գործընթացներ են տեղի ունեցել, որոնք նպաստել են բազմաթիվ փաստաթղթերի ստորագրմանը: «Օրինակ՝ հրաժարվեցինք վիզային ռեժիմից, որը գործում էր Հայաստանի եւ Իրանի միջեւ»,- պարզաբանեց փորձագետը՝ հավելելով, որ Հայաստանում եւ Իրանում նաեւ համատեղ տնտեսական ֆորումներ են անցկացվում:
Այս ամենը, ըստ իրանագետի, նպաստում է զբոսաշրջիկների հոսքի ավելացմանը: Երկկողմ տնտեսական հարաբերություններում դրական ներդրում կունենա նաեւ Հայաստանի Սյունիքի մարզում Ազատ տնտեսական գոտու բացումը: