Հայաստանի կառավարությունը կփորձի աջակցություն գտնել նաեւ նոր խոշորացվող համայնքների համար: NEWS.am-ի թղթակցի հետ զրույցում այս մասին նշեց ՀՀ տարածքային կառավարման եւ զարգացման փոխնախարար Վաչե Տերտերյանը:
Առաջին փուլով խոշորացված համայնքների համար դրամաշնորհներ են ստացել Միջազգային զարգացման շվեյցարական (DDS) եւ ամերիկյան գործակալություններից (USAID)՝ համապատասխանաբար, 8.5 մլն եւ 2.4 մլն դոլարի չափով: 2016 թվականի փետրվարին խոշորացված առաջին երեք համայնքները՝ Դիլիջանը, Տաթեւն ու Թումանյանը, արդեն տեխնիկա են ստացել: Նրանց համար էքսկավատորներ, աղբահավաք մեքենաներ, տրակտորներ եւ կոմբայններ են գնել:
Հայաստանում այսօր արդեն 18 խոշորացված համայնք կա, որոնցում միավորվել են 140 համայնքներ: Ներկայում կառավարությունն առաջարկում է եւս 34 խոշորացված համայնք ձեւավորել՝ միավորելով 347 համայնքներ: