ՄԱԿ-ի փախստականների հարցերով գերագույն հանձնակատար Ֆիլիպո Գրանդին Ավստրալիային կոչ է արել դադարեցնել առանց վիզայի երկիր ժամանող փախստականներին չընդունելու ու նրանց հարակից կղզիներում անընդունելի պայմաններում պահելու «արատավոր պրակտիկան»։ ՄԱԿ-ի փախստականների հարցերով վարչության տվյալներով, մոտ երկու հազար ապաստան փնտրողների Ավստրալիայի իշխանությունները պահում են երկրի հարակից կղզիներում՝ «անընդունելի պայմաններում»։
Վարչության աշխատակիցները օգնել են այդ միգրանտներից մի քանիսին ԱՄՆ տեղափոխվել՝ ԱՄՆ-ի ու Ավստրալիայի միջեւ երկկողմանի համաձայնագրի համաձայն։ Ենթադրվում էր, որ Ավստրալիան կընդունի նրանց, ովքեր այդ երկրում մոտ ազգականներ ունեն։ Սակայն վերջերս իշխանությունները անգամ նման փախստականների մուտքն են արգելել։
«Ավստրալիայի քաղաքականությունը, որը պահանջում է փախստականների գրանցում երկրի սահմաններից դուրս՝ Պապուա Նոր Գվինեայում ու Նաուրուում, շարունակում է տառապանքներ պատճառել այդ մարդկանց, մինչդեռ դրանից կարելի էր խուսափել,- նշել է Գրանդին,- արդեն չորս տարի է երկու հազար մարդ խղճուկ գոյատեւում է անընդունելի պայմաններում»։ Գրանդիի խոսքով նման միգրացիոն քաղաքականությունը մարդկանց պատճառում է ոչ միայն ֆիզիկական , այլեւ հոգեկան տառապանքներ, բաժանելով նույն ընտանիքի անդամներին։